“Runi fëmijët”: Detaje nga vendi i ngjarjes në Malishevë ku sot u vra një person

Një person ka mbetur sot i vdekur në Banjë të Malishevës ku u qëllua me armë zjarri.

Ekipi i Nacionales po qëndron në vendin e ngjarjes, prej ku ka mësuar se i dyshuari është 47 vjeçar.

Po ashtu, burime kanë bërë të ditur se viktima dhe i dyshuari kanë qenë kolegë punë.

Pas aktit, i dyshuari ka shkuar në shtëpi ku ka njoftuar vëllain për vrasjen dhe citohet t’i ketë thënë “runi fëmijët”.

Ai më pas është dorëzuar në polici.

Ndërkohë, vrasjen e ka konfirmuar edhe Sheremet Elezaj, zëdhënës i Policisë i cili ka bërë të ditur se motivet e rastit ende nuk dihen.

“Rreth orës 07:15 është raportuar se në fshatin Banjë-Malishevë, viktima mashkull i moshës madhore është gjetur pa shenja jetë, dyshohet të jetë qëlluar me armë zjarri. Ekipi mjekësor i cili ka dalë në vendin e ngjarjes ka konstatuar vdekjen e tij. Një person, po ashtu mashkull i moshës madhore, është dorëzuar në Stacionin Policor në Malishevë dhe nga hetimet e para dyshohet se i njëjti, për motive ende të panjohura, ka qëlluar viktimën me armë zjarri. Njësitet e nevojshme policore kanë dalë në vendin e ngjarjes si dhe është njoftuar prokurori i shtetit në koordinim të cilin janë duke u ndërmarr veprimet e nevojshme hetimore” – tha Elezaj.