Vdes mamia llapjane Sanije Topanica, iu ndihmoi grave në lindje gjatë luftës
Rrjeti i Grave – Beqës: Kërkoji falje Kusari-Lilës
Rrjeti i Grupeve të Grave të Kosovës (RrGGK) ka kërkuar nga Hajdar Beqa, kryetar i degës së PDK-së në Gjakovë që t’i kërkojë falje kryetares së Gjakovës, Mimoza-Kusari-Lila, pasi që e quajti këtë të fundit “prostitutë politike”.
“RrGGK e konsideron këtë deklaratë absurde dhe shumë ofenduese për të gjitha gratë dhe vajzat e Kosovës, sidomos për gratë në politikë dhe vendimmarrje. Deklarata të tilla, e që kohëve të fundit nuk janë të pakta, vetëm e përforcojnë diskriminimin ekzistues social, politik dhe ekonomik gjinor në Kosovë. RrGGK e konsideron të papranueshme tërheqjen e paraleleve në mes të dështimeve në negociata dhe të qenit grua”.
“RrGGK kërkon nga z. Beqa që të kërkojë falje për deklaratën ofenduese ndaj znj. Mimoza Kusari – Lila duke dënuar rëndë këtë gjuhë seksiste, si dhe çfarëdo lloji të justifikimit të diskriminimeve të tilla gjinore që shkelin ligjet e Kosovës”.
“Me këtë deklaratë, Hajdar Beqa ka shkelur Ligjin kundër Diskriminimit (2015) si dhe Ligjin për Barazi Gjinore (2015). Republika e Kosovës siguron barazinë gjinore si vlerë themelore për zhvillimin demokratik të shoqërisë, mundësi të barabarta për pjesëmarrje të grave dhe burrave në jetën politike, ekonomike, sociale, kulturore dhe në fusha të tjera të jetës shoqërore”, thuhet mes tjerash në një reagim të RrGGK-së.
