Rrahja e imamit nga Podujeva prej radikalëve, ende asnjë fjalë nga Kurti, Osmani e Konjufca

Rrahja e imamit 60-vjeç, Zeqir Berisha, ka tronditur opinionin në Kosovë. I sulmuar nga tre vëllezër që dyshohen të jenë ndikuar nga radikalizmi fetar islam, i ka alarmuar hoxhallarët e ekspertët e sigurisë. Tre vëllezërit Murturi tashmë janë arrestuar, gjersa imami vazhdon të trajtohet në QKUK.

Përkundër që sulmi u bë nga radikalistë myslimanë, udhëheqësit shtetërorë ende nuk kanë reaguar.

Heshtje varri

Berishën e sulmuan me shufra metalike, duke i shkaktuar gjakderdhje të brendshme. Edhe familjarët e tij, por edhe kryeimami i Podujevës, Bekim Jashari, kanë thënë se sulmi erdhi për arsye fetare.

Sipas tyre, hoxha kishte probleme të vazhdueshme në lidhje me praktimin në xhami, duke aluduar se tre sulmuesit ishin të indoktrinuar nga vehabizmi, lëvizje radikale islame.

Xhamia / “Viktimë e islamit radikal”, hoxhallarë e ekspertë të sigurisë alarmojnë pas sulmit të imamit në Podujevë

Ndonëse ka orë që është duke u raportuar për sulmin e imamit nga radikalët fetarë, udhëheqësit shtetërorë ende nuk kanë bërë ndonjë reagim.

Kryeminsitri Albin Kurti, si udhëheqës i Qeverisë, ende nuk ka folur për rastin.

Njëjtë, e heshtur deri më tani është edhe presidentja Vjosa Osmani.

Si shefe e shtetit, Osmani nuk është deklaruar për sulmin gati deri në vdekje ndaj imamit Berisha.

Osmani u pa në konferencë me presidentin e Shqipërisë, Ilir Meta, por as aty nuk foli ndonjë fjalë për rrahjen brutale ndaj imamit.

Pa fjalë ende është edhe kryetari i Kuvendit, Glauk Konjufca.

As ministri i Punëve të Brendshme, Xhelal Sveçla, i cili mund të informohet nga dora e parë si shef i Policisë. Madje, edhe me informacione që nuk i kanë as mediet.

As ministrja e Drejtësisë, Albulena Haxhiu, nuk është deklaruar për rastin .

Alarmimi

Por, hoxhallarë e njohës të islamit radikal në vend, kanë ngritur alarmin për rikthimin e radikalizmit pas sulmit ndaj Berishës.

Një rrahje deri në alivanosje në fshatin Lupç të Poshtëm të Podujevës, ka tronditur opinionin. Cak i sulmit ishte një hoxhë (60-vjeç), i cili u rrah nga xhemati i tij. Tre vëllezër, të cilët dyshohen për bindje ekstreme, përdorën shufra metalike për t’i qëruar hesapet rreth organizimit të xhamisë.

Tashmë, tre vëllezërit Murturi, të cilët dyshohen për sulmin, janë arrestuar, e sipas burimeve të gazetës Nacionale, ata janë të indoktrinuar nga doktrina e vehabizmit.

Lajmi për rrahjen e imamit Zeqir Berisha, ka rikthyer në qendër të debatit një temë tashmë të harruar: të rinjtë e radikalizuar.

Bekim Jashari, kryeimam i Këshillit të Bashkësisë Islame në Podujevë, tha se sulmi erdhi nga njerëz që tentuan të instalojnë një islam ndryshe.

“Informacioni i parë, nëse i kthehemi kronologjisë, është se imami ka qenë në Gllamnik dhe ka ardhur në Lupç. Imami viteve të fundit ka pasur probleme me një predikim të një islami ndryshe, e për të cilat na kanë njoftuar. Ka pasur tendenca për ndërhyrje në autonominë e tij të punës. Shkolla jonë është Hanefi, dhe imami e ka ruajtur këtë frymë. Në këtë situatë mund të japim versionet se i besojmë imamit tonë, sepse ai është legjitim për të kryer detyrën e tij”, tha Jashari në T7.

Tutje, ai ka treguar se edhe më parë imami ishte sulmuar verbalisht.

“Është tentuar që islami në këtë xhami të marrë pamje ndryshe. Pa paragjykuar sulmuesit. Këta i njoh si emra. Në vitin që shkoi i kemi takuar në zyrën tonë. U kemi treguar atyre se Bashkësinë Islame e përfaqëson imami dhe ju jeni vetëm xhemat. Nëse ka elemente të sulmit ideologjik, bëjmë me dije se në Llap, Kosovë e Shqiptari, elemente të frymëzuara nga doktrina të huaja nuk do të kenë vend në Llap. Urojmë që të mos dalë kjo. Është ankuar dhjetëra herë në Bashkësi Islame dhe në Policinë e Shtetit. Një punëtor që ka qëlluar para 3 jave në xhami ka treguar se është sulmuar fuqishëm verbalisht imami në fjalë”, shtoi ai.

Ndërsa Osman Musliu, në një prononcim për gazetën Nacionale, tha se dhuna e ushtruar ndaj imamit është gjëja më e keqe që mund të ndodhë.

“Dhuna e ushtruar sot ndaj imamit është gjëja më e keqe që mund të ndodhë, sidomos kur ajo ushtrohet brenda një xhamie. Por, fatkeqësisht, kjo nuk është hera e parë kur matrapazët sillen si kapadai brenda xhamive të Kosovës. Unë vetë kam qenë i sulmuar nga ekstremistë apo radikalë ndaj të cilëve kam ngritur zërin moti. Fatkeqësisht, edhe ngritja e zërit për të tërhequr vëmendjen tek ky problem por edhe vetë dhuna e ushtruar ndaj meje dhe kolegëve të mi, janë neglizhuar, duke hasur në vesh të shurdhër tek institucionet fetare por edhe ato shtetërore”, deklaroi ai.

Sipas Bedri Elezit, njohësit të çështjeve të radikalizmit fetar në Kosovë, sulmi duhet konsideruar i rëndë për sigurinë e qytetarëve.

“Sulmi fizik ndaj imamit të moshuar në fshatin Lupç, komuna e Podujevës, z. Zeqir Berisha, nga tre vëllezërit Murturi për të cilët viktima thotë se janë persona me bindje radikale dhe vehabiste dhe të nijetit, e kanë shqetësuar, edhe më parë duhet konsideruar si tejet i rëndë për sigurinë e qytetarëve. Sidomos kur marrim parasysh faktin se Kosova po ballafaqohet me një radikalizëm tejet të shpejtë, dhe mosreagimin e autoriteteve të sigurisë në kohë reale.“

Por, Elezi ka edhe kritika ndaj shtetit të Kosovës, i cili sipas tij nuk po merret seriozisht me luftimin e radikalizmit.

“Fakti se autoritetet e sigurisë dhe inteligjencës po lejojnë punën e shumë imamëve në xhami të cilat janë pa dekret dhe kontroll të BIK, nënkupton edhe një lloj mbështetjeje të aktiviteteve të dyshimta e të cilat në vazhdimësi mund të sjellin edhe aktivitete dhune në Kosovë. Ka dyshime se këta persona apo grupe mbështeten nga burime të dyshimta financiare, e të cilat dyshohet se kalojnë përmes strukturave sekrete serbe dhe ruse”, përfundoi ai.