Rifillon rinumërimi i të gjitha votave në Podujevë, evidentohen parregullsi të mëdha

Ka rifilluar sot rinumërimi i të gjitha kutive të votimit në Podujevë, në kuadër të verifikimit të plotë të procesit zgjedhor të 28 dhjetorit 2025.

Sipas të dhënave zyrtare, deri tani janë rinumëruar 13 vendvotime, ku janë evidentuar parregullsi të shumta dhe serioze. Gjatë rinumërimit ka rezultuar edhe një numër i madh i votave të prekura, çka ka ngritur shqetësime për integritetin e procesit zgjedhor në këtë komunë.

Procesi i rinumërimit po zhvillohet nën mbikëqyrjen e institucioneve përgjegjëse dhe pritet të vazhdojë edhe në ditët në vijim deri në përfundimin e verifikimit të të gjitha kutive të votimit.

Mbetet të shihet nëse pas përfundimit të rinumërimit do të ketë reagime institucionale apo masa të tjera ligjore lidhur me parregullsitë e konstatuara.

Podujevapress.net do të vazhdojë të informojë opinionin publik për çdo zhvillim të ri rreth këtij procesi.