Riaktualizohet çështja e demarkacionit, opozita e vendosur për kundërshtim të versionit aktual

Zyrtarë të shtetit thonë se çështja e demarkacionit vazhdon të jetë një ndër pikat kyçe për mundësinë e liberalizimit të vizave për kosovarët. Madje vetë kryeministri Mustafa ka ripërsëritur vazhdimisht se pa kaluar demarkacioni në Kuvendin e Kosovës, nuk ka liberalizim të vizave. I kontaktuar nga Indeksonline, shefi i Grupit Parlamentar të Aleancës për Ardhmërinë e Kosovës, Pal Lekaj ka theksuar se demarkacioni në këtë version është i papranueshëm.

“Demarkacioni në këtë version është i papranushem këtë e kemi thënë e ri thënë e do ta ritheksojmë sa herë të jetë nevoja.Ky version i demarkacionit ka vdekur që moti, por Isa Mustafa është duke tentuar ta mbajë të gjallë me zor me disa mjete që aspak nuk shkojnë në favor të gjetjes së një zgjidhje e cila do ta shpëtonte Kosovën në të gjitha drejtimet. Edhe sa i përket liberalizimit të vizave edhe sa i përket territorit”, ka thënë Lekaj.

Sipas tij, komisioni i zgjedhur për territorin e Kosovës, është tentim për të ringjallur versionin e demarkacionit.

“Komisioni me të cilin është zgjedhur ta udhëheqë një shok i kryeministrit është pikërisht njëra nga mjetet përmes të cilave kryeministri po tenton ta ringjallë këtë version të demarkacionit. Por ne e kemi bërë të qartë me kohë që nuk e kemi luksin të bëhemi pjesë e asnjë grupi a komisioni i cili rrezikon të legjitimoi të papranueshmen që është e dëmshme për Kosovën”, ka shtuar Lekaj.

Gjithashtu Lekaj ka thënë se për sa të ketë tendenca për imponim të marrëveshjeve që vetëm e ndajnë dhe e copëtojnë Kosovën, do të vazhdojnë të jenë në ballë të popullit për të mbrojtur atë çka është lënë pas.

“Përtej kësaj nuk kemi ku shkojmë prandaj nuk tërhiqemi nga e drejta jonë për të ruajtur sovranitetin e integritetin territorial”, ka përfunduar Lekaj.

Në anën tjetër Shefja e Grupit Parlamentar të Nismës për Kosovën, Valdete Bajrami ka ritheksuar se çështja e demarkacionit ashtu siç po paraqitet nga Mustafa, se është i vetmi kusht për liberalizimin e vizave, nuk qëndron si i tillë.

“Çështja e demarkacionit ashtu siç po tenton z.Mustafa ta paraqet sikur të vetmin kusht për liberalizim të vizave nuk qëndron, por ky zotëri po i ik përgjegjësisë në përmbushjen e kriterit tjetër ati të luftimit të krimit të organizuar dhe korrupsionit”, ka thënë Bajrami.

Sipas Bajramit, duhet të dinë të gjithë qytetarët se me këtë qeveri nuk do të mund ta gëzojnë lëvizjen e lirë.

“Kjo për faktin se këta janë të interesuar që vetëm interesat e tyre personale ti mbrojnë dhe asesi të jenë në shërbim të qytetarëve e as të shtetit. Se këta nuk janë të shqetësuar për izolimin e qytetarëve dëshmohet edhe me qasjen e tyre me Ministrin e Integrimeve ku edhe sot ky dikaster është pa ministër”, ka thënë Bajrami.

Ajo ka thënë se Nisma do ta kundërshton këtë version të marrëveshjes aktuale të demarkacionit dhe deri sa nuk do të rishikohet, ajo do ta kundërshtojmë sepse sipas saj nuk do të lejohet humbja e mbi 8200 ha tokë./Indeksonline/