Reforma zgjedhore e domosdoshme për Kosovën

Se reforma zgjedhore është e domosdoshme e thotë analisti politik, Behlul Beqaj.
Ai për Indeksonline është shprehur se e vetmja rrugë për të ndryshuar kualitetin ligjvënës dhe ekzekutiv është përmes reformave zgjedhore.

“Rruga për të ndryshuar kualitetin ligjvënës dhe ekzekutiv, shkon përmes reformës së Ligjit të zgjedhjeve, Ligjit për partitë politike që krijojnë kushte për një strukturë tjetër të përfaqësuesve të popullit. Është domosdoshmëri e kohës që përmes ndërrimit të sistemit zgjedhor të ndërrohet mënyra e vendimmarrjes. Reformat duhet të fuqizojnë, individin, sovranin e jo liderin që është shërbyer me qytetarët deri sot. Ndërsa presidenti të reflektoj vullnetin politik të popullit e të mos jetë produkt i pazareve të brendshme dhe të jashtme politike”, është shprehur Beqaj.

  Behlul Beqaj

Beqaj me tutje ka shtuar se ata që kanë premtuar reforma zgjedhore e kanë kuptuar se do të kishte pasoja për ta. Sipas tij, kjo është arsyeja pse lidershipi njëjtë po bëhet pengesë e ndryshimit.

“Ata që kanë premtuar reforma zgjedhore (Marrëveshja Dell, Thaçi, Mustafa, Pacolli…) e kanë kuptuar se sikur ato t’i ndërmerrnin do të kishin pasoja. Prandaj e kemi, mjerisht, ende lidershipin e njëjtë në skenë që është shndërruar si pengesë e ndryshimit. Prandaj rreth 30% të deputetëve të rinj të Parlamentit të Kosovës rrezikohen të tretën në mendësinë lidershipit të vjetër. Pra, në vend qe të kishim ngritje të kualitetit zgjedhor, ai ndryshim që ka ndodhë në kuadër të vullnetit aktual politik dhe mundësive ligjore objektive do të rrezikohet seriozisht,e me këtë edhe mundësia për reforma, në të ardhmen e shpejtë” ka thënë Behlul Beqaj.