Reflektimi që mungon: Opozita në Podujevë në gjumë pas humbjes së 12 tetorit

(Analizë nga Podujeva PRESS)

Zgjedhjet e 12 tetorit 2025 shënuan një moment të qartë politik në Podujevë: Shpejtim Bulliqi dhe Lëvizja Vetëvendosje! siguruan për herë të tretë mandatin për ta udhëhequr komunën, këtë herë pa balotazh, me 53.47% apo 20,455 vota.

Në anën tjetër, opozita lokale, veçanërisht Lidhja Demokratike e Kosovës, po kalon në heshtjen më të thellë që nga paslufta.

I vetmi reagim publik pas rezultatit erdhi nga kandidati për kryetar, Ekrem Hyseni, i cili në një postim të shkurtër në rrjete sociale shkroi:

“Të dashur qytetarë,

Shpreh falënderimin tim për çdonjërin prej jush që na përkrahët e na besuat.

Rrugëtimi ynë vazhdon.

Përpjekjet tona për ringritjen e Lidhjes sonë vazhdojnë!

Jemi bashkë sot, do jemi bashkë përherë!”

Por përtej këtij statusi simbolik, LDK nuk ka dhënë asnjë qëndrim politik zyrtar, asnjë analizë për humbjen, e as ndonjë paralajmërim për ndryshime në strukturat lokale.

Në terren, mungon reflektimi, mungon debati, mungon qartësia.

Ndërkohë, PDK, AAK dhe NISMA e cila tani nuk ka as kryetar pasi që ka dhënë dorëheqje, duken sikur kanë dalë plotësisht nga skena.

Vetëm disa statusa falenderues, asnjë reagim, asnjë lëvizje.

E vetmja “lufte” që po zhvillohet është ajo për numrat, kush mori më shumë vota për asamble, kush hyri e kush mbeti jashtë.

Shumica e kandidatëve pas numrimit te votave po del te jetë se kanë lobuar vetëm për veten, jo për kryetarin, jo për partinë, as për një vizion të përbashkët politik.

Kjo qasje tregon se opozita në Podujevë po bie në gjumë të thellë politik, ndërsa Vetëvendosje! po konsolidon pushtetin me një stabilitet të padiskutueshëm.

Në një qytet ku dikur LDK kishte themelin e saj historik, sot mungon edhe zëri më i vogël i vetëkritikës.

Nëse opozita vazhdon kështu me heshtje, pa reflektim, e pa strategji ajo rrezikon të bëhet thjesht një emër në fletën e votimit, por jo një alternativë për qytetarët.

Në politikë, humbja mund të jetë fillim i ri, por vetëm për ata që e pranojnë, e analizojnë dhe e shndërrojnë në mësim.

Në politikë, humbjet mund të jenë të vlefshme vetëm nëse prej tyre nxirren mësime. Por në Podujevë, opozita po rrezikon të kthehet në figurë dekorative, ndërsa Vetëvendosje! konsolidon pushtetin lokal më shumë se kurrë më parë.

Nëse kjo heshtje vazhdon, rreziku është që opozita të mos jetë më as opozitë, por thjesht një kujtim i një kohe kur konkurrenca politike në Podujevë ekzistonte.

Tani është momenti për reflektim, jo për heshtje. Sepse heshtja pas humbjes është më e rëndë se humbja vetë.