Reagon Grenell, ky është mesazhi i tij për qeverinë Kurti mbi reciprocitetin

I dërguari special i Shteteve të Bashkuara të Amerikës për dialogun Kosovë-Serbi, Richard Grenell, ka thënë se është kundër masave të reciprocitetit, të cilat i ka paralajmëruar kryeministri Albin Kurti ndaj Serbisë.

Zëdhënësi i tij, Dick Custin, tha për Radion Evropa e Lirë se Grenell e inkurajon Kosovën që ta heqë taksën 100% ndaj prodhimeve të importuara nga Serbia, pa reciprocitet.

“Kosova duhet ta heqë taksën ndaj mallrave të Serbisë, pa reciprocitet. Jo vetëm ta pezullojë, por ta heqë plotësisht atë”, ka thënë Custin.

Ai tutje ka shtuar se ambasadori Grenell nuk e përkrahë idenë e reciprocitetit, për të cilën është paralajmëruar nga kreu i Qeverisë së Kosovës.

“Ambasadori nuk e mbështet idenë e reciprocitetit”, ka përfunduar Custin.

Kosova u ka vënë taksë 100% prodhimeve të importuara nga Serbia dhe Bosnje e Hercegovina në nëntor të vitit 2018.

Shtetet e Bashkuara dhe Bashkimi Evropian në vazhdimësi kanë kërkuar pezullimin apo edhe shfuqizimin e kësaj takse, pasi ajo u konsiderua si shkak që Serbia të tërhiqet nga tavolina e bisedimeve me Kosovën, deri në heqjen e tarifave doganore apo taksës.

Kurti, i cili ka marrë detyrën e kryeministrit javën e kaluar, ka thënë se kjo masë do të zëvendësohet me reciprocitet dhe, siç është shprehur ai, faktorët ndërkombëtarë do të kenë mirëkuptim për këtë.