Reagon Bulliqi: Podujeva mbetet pa Spital të Përgjithshëm, s’përfshihet në buxhetin e vitit 2021

Kryetari i komunës së Podujevës, Shpejtim Bulliqi, ka reaguar pas miratimit të buxhetit për vitin 2021 sot në seancën e Kuvendit, shkruan PodujevaPRESS.net

Bulliqi ka thënë se në buxhetin prej 2.4 miliardë eurove nuk përfshihet asnjë ndarje buxhetore për Spitalin e Përgjithshëm të Podujevës.

Buxheti i vitit 2021, i cili u miratua në Kuvendin e Kosovës para pak minutash nuk ka paraparë ndarje buxhetore për Spitalin e Përgjithshëm të Podujevës.

Ai projekti që paraqitej me pompozitet në fushatën zgjedhore në Llap nuk është askund. Ata që bënë zhurma mediatike për ndërtimin dhe funksionalizimin e Spitalit të Qytetit, që e kishin premtuar disa herë po dëshmohet se ka qenë gënjeshtër dhe mashtrim për qytetarët. Ai projekt është përdorur në funksion të fushatave elektorale e për qëllime të ulëta politike. Sot, ky projekt nuk është amandamentuar për buxhetin e vitit 2021 nga Qeveria Hoti, e kështu komunën tonë vazhdon ta lërë pa Spital të Përgjithshëm.