Reagim i PDK-së në Podujevë: Thirrje qeverisë të marrin masa urgjente për të përfunduar punimet në rrugën Podujevë-Prishtinë

Pamja në këtë fotografi tregon një situatë alarmante dhe të papranueshme në rrugën prej 20 kilometrash. Punimet që kanë mbetur të papërfunduara për gati 2-3 vite kanë krijuar një terren të pasigurt dhe të rrezikshëm për të gjithë përdoruesit e rrugës. Pluhuri i dendur që mbulon gjithë zonën, gropat e mëdha dhe infrastruktura e dëmtuar tregojnë qartë neglizhencën dhe mungesën e përgjegjësisë nga autoritetet, thuhet në reagimin e PDK-së dega në Podujevë, transmeton PodujevaPRESS.net

Qytetarët që kalojnë në këtë rrugë prej 20 kilometrash po përballen me një terror të vërtetë për shkak të kushteve të këqija të saj. Situata është e padurueshme dhe kërkon ndërhyrje të menjëhershme nga autoritetet.

Kalimi përmes kësaj rruge është kthyer në një torturë të vërtetë për qytetarët. Automjetet e ngadalësuara, trafiku i rënduar dhe pamundësia për të udhëtuar në mënyrë të sigurt kanë sjellë një situatë ku frika dhe pasiguria mbizotërojnë. Banorët dhe udhëtarët janë të ekspozuar ndaj rreziqeve të shumta për shëndetin dhe sigurinë e tyre.

Përballë kësaj situate, i bëjmë thirrje qeveritarëve të marrin masa urgjente për të përfunduar punimet në këtë rrugë. Ndërprerja e vonesave dhe përshpejtimi i realizimit të punimeve është thelbësore për të garantuar sigurinë dhe mirëqenien e qytetarëve. Kërkojmë që autoritetet të tregojnë përgjegjësi dhe të ndërhyjnë menjëherë për të zgjidhur këtë problem të rëndë që po prek qytetarët tonë.

Është e domosdoshme që qeveritarët të ndërhyjnë menjëherë për të përshpejtuar realizimin e punimeve, në mënyrë që qytetarët të mund të udhëtojnë të sigurt dhe pa stres. Një zgjidhje e shpejtë është e domosdoshme për të rikthyer sigurinë dhe normalitetin në jetën e përditshme të qytetarëve tanë.