Qytetarët me qëndrime të ndryshme se çfarë të bëhet me drunjtë në qendër të Podujevës

Qytetarët e Komunës së Podujevës kanë shprehur qëndrime të ndryshme rreth drunjve që gjenden në qendër të qytetit, ku parashihet të ndërtohet bulevardi dhe “Sheshi i Dëshmorëve”.

Në debatin e mbajtur për këtë çështje, disa kanë kërkuar të hiqen të gjithë dhe të zëvendësohen me drunj të rinj, ndërsa të tjerë kanë mendojnë se duhet të ruhen ata që nuk janë të dëmtuar. As zyrtarët komunalë nuk kanë treguar ndonjë vendim definitiv rreth kësaj çështje, raporton Koha Ditore.

Drejtori për Bujqësi, Pylltari dhe Zhvillim Rural, Vezir Januzi, ka thënë se në pjesën ku parashihet të ndërtohet bulevardi skaj rrugës ka drunj shumëvjeçarëdhe se janë duke shikuar a duhet të hiqen të gjithë, apo të lihen ata që nuk janë të dëmtuar.

“Kemi marrë ekspert edhe të pylltarisë dhe pastaj do të marrim ehde vendim se çafrë të bëjmë me këta drunj, por gjithsesi do të mundohemi t’i ruajmë, t’i rigjenerojmë dhe të pyllzojmë pjesën tjetër të qytetit”, ka thënë drejtori Januzi në këtë debat me qytetarë.

Ndërsa, zyrtari për mjedis, Rizah Muçolli, ka thënë se kanë marrë shumë kërkesa nga qytetarët, ku disa kërkojnë të hiqen të gjithë, disa mendojnë të lihen.

“Komuna e ka formuar një komision ku janë edhe përfaqësuesit e Agjencisë së Pyjeve të Kosovës. Është fjala vetëm për drunjtë që janë skaj rrugës e ku paraashihet të ndërtohet bulevardi. Aty janë 134 drunj, ku 76 janë të dëmtuar që duhet të hiqen dhe është menduar që 58 të qëndrojnë për një kohë, por jo gjatë. Drunjtë kanë dëmtime serizoe në trup. Janë dëmtuar edhe gjatë puimeve në kanalizim, puseta, po ashtu gjatë pastrimit të rrugës nga bora. Por, mund të dëmtohene dhe tash kur punohet në ujësjellës, rrymë, etj”.

Muçolli ka thënë se janë para disa dilemave: që të sillen krejt drunjë të rinj më unikë për shesh, opsioni i dytë të hiqen 76 dhe të lihen 58 dhe dilema e tretë është se edhe këta 58 mund të dëmtohen gjatë punimeve dhe pas një viti do të jenë të detyruar t’i heqin edhe ata.

Afaristi në rrugën “Zahir Pajaziti”, Bajram Murati ka thënë se përpara lokalit të tij janë disa blirë që janë mbjellë në vitet 1998-1999 dhe se janë dashur 20 vjet për të arritur efektin. Sipas tij, duhet të hiqen vetëm drunjtë e dëmtuar dhe jo të gjithë.

Por, një tjetër banor i qendrës ka thënë se duhet të hiqen të gjithë, pasi edhe ata drunj që nuk janë të dëmtuar janë të shtrembër dhe se do të jenë të disproporcion me projektin, pasi nuk do të përshtaten as me dimension e as me hapësirë.

Mendim të ngjashëm ka pasur edhe një afarist tjetër. Ndërsa këshilltarja e VV-së, Doruntina Hasani ka thënë se drunjtë duhet të qëndrojnë aty edhe për shkak të historisë që bartin, por jo ata që janë të dëmtuar. Ajo ka kërkuar që kur të sillen drunjtë e rinj të jenë të gjatë dhe të mos pritet 20 vjet për të arritur efektin.

“Ne edhe nëse nuk na kithit thirrë në këtë debat, e kemi pas ndërmend me disa qytetarë që nëse nuk i hiqni këta drunj me dalë edhe me protestua. Drunjtë janë shumë të dëmtuar edhe shumë të vjetër”, ka thënë ai.

Edhe një tjetër banor i qendrës ka thënë se tash mund të mbillen drunj që i kanë moshë 10-15 vjet dhe po ashtu me jetëgjatësi të madhe, ndërsa drunjtë e tanishëm nuk duhet të lihen për shkak të dëmtimeve që i kanë dhe po ashtu se janë të shtrebër.

Ndërsa, inxhinieri i pylltaris në Agjencinë e Pyjeve të Kosovës, Naser Krasniqi, ka thënë se drunjtë aktualë janë të dmëtuar shumë dhe se forma e tyre është deformuar.

“Për një shesh afatgjatë duhet të hiqen këta drunj dhe të mbillen të tjerë të bukur me jetëgjatësi të madhe”, ka theksuar ai.

Ka pasur kërkesa që drunjtë e padëmtuar të mbillen dku tjetër, p.sh. në park.

Drejtori Vezir Januzi ka thënë se opinionet e qytetarëve do t’u ndihmojnë për të vendosur se çfarë të bëjnë me këta drunj. Ai ka thënë se me projektin e ndërtimit të bulevardit parashihet të mbillen lloje të ndryshme të drunjve dhe se do të ketë gjelbërim të mjaftueshëm.