Qeveria mund të mos e procedojë Demarkacionin as nesër

Procedimi i marrëveshjes së Demarkacionit me Malin e Zi që ishte pika e parë e rendit të ditës në mbledhjen e djeshme të Qeverisë së Kosovës, duket se nuk do të ndodhë as nesër, ditë për kur ishte shtyrë kjo mbledhje e qeverisë.

Përderisa është bërë publike që në mëngjesin e nesërm do të mbahet mbledhja e Kryesisë së Kuvendit dhe mbajtja e seancës plenare të Kuvendit të Kosovës, ku pritet të votohet mocioni i tri partive opozitare (Vetëvendosje, AAK dhe NISMA) për rrëzimin e qeverisë.

Mbledhja e Qeverisë nuk është paralajmëruar, shkruan gazetametro.net.

Deri më tani Qeveria e udhëhequr nga Isa Mustafa nuk ka lajmëruar zyrtarisht për asnjë mbledhje që do të mbajnë ditën e nesërme.

Burime të Gazetës Metro bëjnë të ditur se qeveria ende nuk i ftuar ministrat e saj për mbledhjen të mundshme gjatë ditës së nesërme, mbledhje ku edhe do të procedohej demarkacioni.

Kurse, është kryeparlamentari Kadri Veseli ai i cili ka kërkuar që Demarkacioni të procedohet për votim në Kuvend, para votimit të mocionit.

Veseli në një bisedë telefonike me diplomatin amerikan Hoyt Yee ka diskutuar për kërkesën e qartë të Shteteve të Bashkuara të Amerikës që Qeveria dhe Kuvendi të procedojnë me demarkacionin nesër (e mërkure) para mocionit të mosbesimit të qeverisë, shkruan gazetametro.net

Ndërsa e kundërta e këtj skenari do të ishte mundësia që deputetët e PDK’së ta votojnë rrëzimin e qeverisë.

Por, kreu i LDK’së, Isa Mustafa ka përsëritur vazhdimisht se partia e tij nuk mbështet idenë e zgjedhjeve të parakohshme. E në këtë pikë Mustafa ka me vete pothuajse të gjithë zërat brenda partisë, zyrtarë e deputetë të LDK’së deklarohen tash e sa kohë kundër prishjes së koalicionit PDK-LDK  dhe mundësisë që qeveria të përfundojë mandatin ndryshe, përveç se me përfundim të rregullt të afatit qeverisës. /gazetametro/