Punimet shkel e shko: U përurua para pak muajsh, dëmtohet ambulanca në Dumnicë të Podujevës

Punimet shkel e shko: Vitin e kaluar u përurua, dëmtohet ambulanca në Dumnicë të Podujevës

Pak muaj pas përurimit të Ambulancës së Mjekësisë Familjare në fshatin Dumnicë e Poshtme e Podujevës, uji ka depërtuar brenda duke dëmtuar kështu tavanin e dyert e këtij objekti. Përfaqësues të shoqërisë civile kanë kërkuar nga institucionet lokale që të jenë më të përgjegjshme në shpenzimin e parasë publike dhe monitorimin e realizimit të projekteve.

Një shi i rrëmbyeshëm muajin e kaluar ka shpërfaqur defektet në objektin e ri shëndetësor në fshatin Dumnicë të Poshtme të Podujevës, pak muaj pas funksionalizimit.

Uji që ka depërtuar nga kulmi ka dëmtuar tavanin e dyert dhe një shtrat të kësaj ambulance që ka filluar punën në muajin prill të këtij viti.

“Ne kërkojmë nga institucionet përkatëse që të jenë shumë më të përgjegjshme në ruajtjen e parasë publike duke kërkuar llogaridhënie nga menaxheri i projektit po ashtu edhe nga kompania kontraktuese e cila e ka për obligim që dy vjet pas përfundimit të kontratës, ta mirëmbajë atë objekt. Mirëpo, edhe nëse ka dëmtime, duhet të riparohen nga kompania në fjalë, por gjithsesi duhet të ketë edhe ndëshkime për kompanitë për shkak që të mos kemi një shembull të këtillë edhe në kontrata dhe projekte të tjera”, ka thënë Rexhep Zeka, drejtor ekzekutiv i OJQ-së “Sundimi i Demokracisë në Kosovë”.

Ndërkohë, drejtori për Shëndetësi dhe Mirëqenie Sociale, Driton Veliu, ka thënë se defekti në këtë objekt shëndetësor ka ndodhur pas skadimit të garancionit dyvjeçar që e ka pasur kompania punëkryese.

“Kur e kemi funksionalizuar ne këtë objekt shëndetësor, ky objekt tashmë ka qenë me pranim teknik të kryer. Mirëpo, ka kaluar edhe afati i skadencës dyvjeçare të garancionit. Ne menjëherë i kemi marrë masat e nevojshme si qeveri komunale, duke intervenuar së pari në kulm, d.m.th. kemi arritur që ta bëjmë renovimin e asaj pjese të mbyllur të ullukëve dhe tashmë do të vazhdojmë edhe me pjesët e brendshme dhe të gjitha ato defekte të cilat kanë ndodhur për shkak të rrjedhjes së ujit”, ka thënë Veliu.

Veliu ka theksuar se ky objekt është ndërtuar në kohën e ish-qeverisë komunale dhe se arsyeja pse nuk e kanë funksionalizuar deri sivjet ka qenë për shkak të mungesës së stafit.

Sipas tij, për shkak edhe të pandemisë COVID-19 ishin detyruar që t’i mbyllin edhe disa ambulanca të tjera nëpër fshatra për të koncentruar stafin shëndetësor në Qendrën Kryesore të Mjekësisë Familjare./KOHA.net/N.Toverlani/