Pse nuk po shpallen rezultatet preliminare në Podujevë? Edhe sa vendvotime nuk janë numëruar?

Në Komunën e Podujevës, procesi i numërimit të votave është drejt përfundimit, por ende mbetet një vendvotim i panumëruar. Konkretisht, në fshatin Letanc, kutia e vendvotimit me numër 1836/02 nuk është hapur ende.

Sipas të dhënave zyrtare, nga 110 vendvotime në Podujevë, deri më tani janë përfunduar 109 prej tyre, që përbën 99.09% të procesit.

Ndërkohë, Komisioni Qendror i Zgjedhjeve (KQZ) ka sqaruar se arsyeja pse nuk janë publikuar rezultatet për subjektet politike në 21 vendvotime në nivel vendi (0.83% e tyre) lidhet me një procedurë teknike të gabuar pas numërimit të votave.

Zëdhënësi i KQZ-së, Valmir Elezi, ka sqaruar se formularët e rezultateve janë vendosur brenda kutive të votimit, në vend që të vendoseshin mbi to, siç parashihet me procedurë. Kjo ka bërë që këto të dhëna të mos mund të përditësohen për momentin.

“Ju njoftoj se arsyeja pse ende nuk janë publikuar rezultatet preliminare për subjektet politike nga 21 vendvotime apo 0.83% e tyre është se pas numërimit të votave të subjekteve politike, materiali zgjedhor, përfshirë edhe formularët e rezultateve, janë vendosur brenda kutive të votimit dhe jo mbi to, siç e parashihet me procedurë. Andaj, të dhënat nga këto vendvotime nuk mund të përditësohen tani, pasi hapja e kutive të votimit nuk mund të bëhet në këtë fazë, por vetëm kur të fillojë procesi i numërimit të votave të kandidatëve për deputetë,” – tha Elezi.

Kjo situatë ka krijuar vonesa në shpalljen e rezultateve përfundimtare dhe ka ngjallur shqetësime në mesin e qytetarëve dhe partive politike. Megjithatë, pritet që pas hapjes së kutive dhe përfundimit të procesit të numërimit për kandidatët, të gjitha rezultatet të bëhen publike. /PodujevaPRESS.net/