Pse KFOR’i gjerman po largohet nga Kosova

Gjermania ka bërë të ditur se do përfundojë praninë ushtarake në Kosovë deri në fund të vitit të ardhshëm. Vetëm një numër i kufizuar oficerësh do të vazhdojnë të qëndrojnë në Kosovë për të ndihmuar në trajnimin e Ushtrisë së Kosovës.

Media ruse Sputnik për këtë çështje ka biseduar me ekspertin ushtarak serb Andrej Mlakar, të cilin e ka pyetur se pse një nga pesë vendet e NATO-s që përbëjnë pjesën më të madhe të Forcës Shumëkombëshe të Kosovës, vendosi të tërhiqet. Mlakar ka thënë se së pari, Gjermania së bashku me SHBA’në janë kundër propozimit të krijimit të një ushtrie të Kosovës dhe argumentojnë se Forca e Sigurisë së Kosovës (FSK) është e mjaftueshme, përcjellë gazetametro.net.

“Arsyeja e dytë është se forcat e armatosura gjermane po përqëndrohen tani në luftën kundër terrorizmit, duke parandaluar kërcënimet që rrjedhin nga fluksi i refugjatëve dhe gjithashtu në përqëndrimin në mbrojtje nga Rusia pas aneksimit të Krimesë”, ka thënë Mlakar.

Ai përmendi edhe kontigjentin e madh ushtarak që më parë Gjermania kishte dërguar në Lituani dhe Estoni dhe një tjetër që do ta vendos në Poloni.

Një pjesë e objekteve që aktualisht përdoren nga kontigjenti gjerman në Kosovë do të përdoren për të trajnuar pjesëtarët e Forcës së Sigurisë së Kosovës.

KFOR-i hyri në Kosovë më 12 qershor 1999, dy ditë pas miratimit të Rezolutës 1244 të Këshillit të Sigurimit të OKB-së. Trupat e KFOR fillimisht numëruan 50,000 pjesëtarë, nga 39 vende të ndryshme anëtare dhe jo anëtare të NATO-s.

Aktualisht, në Kosovë ndodhen 4,600 trupa nga 31 vende, të cilat pothuajse janë të barabarta me madhësinë e Forcës së Sigurisë së Kosovës.

Që nga futja në Kosovë në vitin 1999, kontigjenti gjerman ka rënë nga 7,000 në 1,500.

Në vitin 2002, NATO filloi të zvogëlojë misionet e saj paqeruajtëse në Ballkan pasi u vlerësua se siguria dhe stabiliteti në rajonin e dëmtuar nga lufta ishte përmirësuar.

Mirëpo, pas trazirave të vitit 2004, NATO vendosi të mos ulë praninë e saj ushtarake në Kosovë. Megjithatë, reduktimi i kontingjentit të KFOR-it rifilloi në 2010. /gazetametro.net