Probleme në ekzekutivin e Podujevës, priten zëvendësime të drejtorëve

Shkuarja e Agim Veliut në pozitën e ministrit duket se ka shaktuar probleme tek ekzekutivi në Podujevë.

Burimet e PodujevaPRESS.net brenda komunës kanë treguar se ushtruesi i detyrës së kryetarit të Podujevës Nexhmi Rudarit, i ka dal “gjendja nga kontrolli”. Kjo pasi që Rudari nuk e ka atë fuqin siç e ka Veliu. Po ashtu Rudari llogaritet si i ardhur nga një subjekt tjetër, pra nuk shihet si pjesë e vjetër e LDK-së.

Probleme kishte nga dita kur ai u propozua për kandidat për kryetar komune, pasi që deri sa ishte drejtor i drejtorisë së Arsimit, Nexhmi Rudari nuk kishte gjetur rehati me strukturat e degës, pasi që akuzohej për punësime familjare. E për favorizime të familjarëve ishte akuzuar edhe nga subjektet opozitare në këtë qytet.

Mirëpo problemet e mëdha kanë filluar pas anulimit të konkursit për infermier shofer të autoambulancës në Qendrën Kryesore të Mjekësisë Familjare në Podujevë, ku siç tregojnë burimet tona për atë pozitë ishte favorizuar djali i njërit prej drejtorëve, (për hirë të korrektësisë nuk do të t’i përmendim emrat), por pikërisht për pozitën e njëjtë kishin shfaqur ambicie edhe disa drejtorë të tjerë konkretisht për të afërm të tyre.

Kjo ka sjell edhe anulimin e pozitës.

Për këtë pati reaguar edhe shoqëria civile në Podujevë. Rrjeti i OJQ-ve, “Demokracia Fillon Këtu”, nëpërmjet një komunikate për medie ka reaguar pas mohimit të së drejtës për të pasur qasje në dokumentet publike.

Sipas DFK-së, në pozitën për infermier të shpallur nga Komuna e Podujevës, gjegjësisht nga Drejtoria e Shëndetësisë, konkursi ka kaluar me parregullsi të shumta. Ky rrjet i OJQ-ve kishte potencuar se sikurse në çdo konkurs, edhe në këtë pozitë po zgjedhen njerëzit e afërt me pushtetin, thuhet, në reagimin e DFK-së

Podujevë, Komuna anulon konkursin për infermier shofer të autoambulancës

Lufta mes gjeneratave në LDK-në e Podujevës

Ardhja e kryetarit të forumit rinorë në krye të drejtorisë së Zhvillimit Ekonomik nuk është pritur mirë nga garda e vjetër e LDK-së në Podujevë. Burimet tona tregojnë se ka një “luftë” për primat mes gjeneratave në këtë degë. Garda e vjetër e sheh veten meritore për fitoret e deri sotme të LDK-së në Podujevë, prandaj ata duan të kenë më shumë hise në ekzekutiv. E të njëjtën hise po e kërkon edhe gjenerata e re.

Ndryshime në ekzekutiv

E si duket kryetarin e degës e ka shqetësuar kjo gjendje. Pikërisht për ti ulur tensionet, burimet tona brenda komunës së Podujevës kanë treguar se Agim Veliu do të bëjë ndryshime në ekzekutiv duke emëruar disa drejtor të rinjë kurse këta aktual do ti dërgojë në nivelin qëndror, pra në qeveri në pozita të ndryshme.

Kujtojmë se zgjedhjet në Podujevë kanë qenë të parapara të mbahen në mars, por që janë shtyer në afat të pacaktuar për shkak të pandemisë COVID-19.

Këto zgjedhje pritet të mbahen pasi që ish-kryetari i kësaj komune, Agim Veliu kishte kaluar në ekzekutiv si ministër i Punëve të Brendshme./PodujevaPRESS.net/