Prishtina pa auditim të brendshëm brenda një viti kalendarik

Komuna e Prishtinës nuk i është nënshtruar asnjë auditimi të brendshëm gjatë vitit të kaluar kalendarik, ndonëse institucioni e posedon Njësinë e Auditimit të Brendshëm (NjAB), e cila operon në përbërje prej katër auditorëve (përfshirë drejtorin e njësisë), shkruan sot Koha Ditore.

Këtë gjë e konfirmon Zyra e Auditorit të Jashtëm, dhe përderisa zyrtarë të Komunës nuk kanë dashur të komentojnë asgjë në lidhje me këtë çështje, përfaqësues të opozitës dhe shoqërisë civile kanë drejtuar kritika të ashpra në lidhje me mungesën e auditimeve të brendshme në Komunë.

Në Raportin e auditimit për punën e Komunës së Prishtinës thuhet se gjatë vitit 2016, përveç një auditimi të veçantë të kërkuar nga kryetari i komunës mbi procedurat për tjetërsim të pasurisë jofinanciare në Qendrën e Mjekësisë Urgjente, NjAB nuk ka kryer asnjë auditim të brendshëm.