Presidentja Osmani njofton për takimin: Macronit i kërkova ta dënojnë Serbinë

Gjatë qëndrimit të saj në Spanjë, në kuadër të Samitit të Bashkimit Evropian, Presidentja Vjosa Osmani ka zhvilluar një takim me homologun e saj nga Franca, Emanuel Macron.

Osmani ka njoftuar se në takimin tete-a-tete, mes të dyve, është folur për situatën e sigurisë pas zhvillimeve të fundit në Kosovë, me theks te përkushtimi për paqe në rajon, shkruan Reporteri.net.

Ajo i ka kërkuar Macronit që Serbia të mos mbesë pa u dënuar për sulmin terrorist ndaj Republikës së Kosovës.

 “Një diskutim i rëndësishëm me presidentin francez @EmmanuelMacron për zhvillimet e fundit të sigurisë në Kosovë dhe përkushtimin tonë të përbashkët për paqen dhe stabilitetin e qëndrueshëm. Theksova rëndësinë e mbajtjes së Serbisë përgjegjëse për aktin e saj të agresionit kundër Republikës sonë”, ka njoftuar Presidentja.

Osmani e Macron kishin polemizuar para pak javësh me njëri-tjetrin, shkaku i një deklarimi të francezit “se Franca mund të rishikojë vendimin që u mundëson kosovarëve udhëtimin pa viza”.

Mirëpo, ky nuk ishte i vetmi takim i shefes së shtetit, në Granada të Spanjës.

Ajo është takuar edhe me kryeministrin britanik, Rishi Sunak, me kancelarin e Gjermanisë, Olaf Scholz, dhe kryeministrin e Greqisë, Kyriakos Mitsotakis, me të cilët zhvilloi biseda, siç tha ajo, të frytshme.

Në të njëjtin samit në Spanjë, është edhe Presidenti serb, Aleksandër Vuçiq, i cili sipas pamjeve që ka siguruar gazeta online Reporteri.net, del se nuk është pritur fort mirë nga liderët evropian të pranishëm.

Nga ana tjetër përfaqësuesi i Lartë i Bashkimit Evropian (BE), Josep Borrell, paralajmëroi të enjten se do të ulet “së bashku” me presidenten e Kosovës, Vjosa Osmani, dhe presidentin e Serbisë, Aleksandar Vuçiq, për të biseduar gjatë samitit të BE-së në Granada të Spanjës.

Osmani ka folur të enjten pak para nisjes së një mbledhjeje në Granadë të Spanjës, në kuadër të Komunitetit Politik Evropian, ku tha se nuk ka takim me Vuçiqin pa u dënuar Serbia.

Në Samit marrin pjesë liderë të vendeve të Bashkimit Evropian dhe rreth 20 liderë tjerë të vendeve të Evropës dhe Kaukazit. /Reporteri.net/.