Pozita e opozita

Shkruan: Besart Rexhepi

Kosova u bë me qeveri të re, pas shumë hajgareve kinse atyre “negociatave” të famshme. Mirë shumë. Sovrani ka fol me 6 tetor 2019 edhe ashtu u bë qeveria, siç deshti sovrani, sepse çfardo “veprimi” tjetër poltikë nëse do të bëhej kishte me sjell pasoja, sidomos për të ardhmen dhe dikush do të bëhej mit në këtë vend pastaj. E mitet janë të rrezikshme për demokracinë.

E dim të gjithë pse u votua aq masovikisht opozita nga qytetarët, dhe përse kemi ardhur deri këtu ku jemi sot. Tani pritjet janë shumë të mëdha, dhe përvoja jetësore ma thotë se nuk do të shkojë gjatë e këto pritje do të sjellin zhgënjim (shpresojë që jo), për arsye se qytetarët presin mrekulli, e në Kosovë do të jetë shumë e vështirë të realizohen ato pritje të atyre që votuan opoziten e djeshme sot pozita.

Por unë nuk do të flas më shumë për këtë qeveri deri sa nuk i bënë 100 ditët e saj, sepse tek atëherë kemi mundësi ta shohim performancën që ajo ka. Krejt çfarë dua ti them pozitës është ky proverb kinez :”kujdes se mundet me tu plotësu dëshira, e pastaj mbetesh në te”.

Shqetësim do të mbetet dalja e të rinjëve jashtë vendit dhe kjo do të fillojë të marrë përmasa edhe më shqetësuese, pas 1 marsit 2020. Për këtë do të bindemi të gjithë shumë shpejt. Por edhe për këtë problem duhet pritur pak muaj, ta shohim si po i qaset kjo qeveri.

Ndërsa sa i përket pozitës së djeshme tani opozita e sotme nëse fillon me imitu veprimet e opozitës së djeshme me sjellje dhe veprime, do ta ketë gjatë qëndrimin në opozitë, sepse tani nuk është as koha as momenti për ato veprime. Tani opozita nëse do ta fitojë pushtetin ajo duhet ti kthehet qytetarit, odë për odë, shtëpi për shtëpi, lagje për lagje, të bashkëbisedojë me qytetarin, ti shoh hallet e tyre, sepse deri dje kanë komunikuar me korrespondencë me anëtarësi e me qytetarë, komunikimin e kanë bërë kryesisht me ndonjë këshilltarë politikë, apo me ndonjë të “deleguar”.

Duke e pasur terenin të lirë për shumë vite dhe duke mos komunikuar me qytetarë, duke mos i parë hallet e tyre seriozisht, kemi sot një qeveri të re në pushtet. Ka edhe shumë arsye tjera por kësaj radhe nuk po i përmend. Por është mirë që ka ndodh kjo, ky rotacion politikë, sepse ndrrimi i pushtetit i bënë të reflektojnë dhe të reformohen subjektet politike, sidomos kur mbesin në opozitë, atëherë fillojnë ta shohin realitetin në teren. Kjo është sikur ai lojtari që nuk pranon të dal nga fusha e lojës, por kur del dhe e shikon ndeshjen nga bankinat e kupton sa keq po luan ai dhe ekipi i tij apo e kundërta.

Prandaj një gjë duhet ta kemi të qartë të gjithë e sidomos kjo vlen për të gjithë politikanët, se përnjëmend Kosova është e vogël me territor, por nuk e ka fillimin nga sheshi “Skenderbeu” deri te sheshi “Zahir Pajaziti” në Prishtinë. Kosova është më e madhe zonja dhe zotërinjë.