Policia s’po falë, ky është numri i gjobave për vetëm 9 ditë

Policia e Kosovës përmes një konference për media ka bërë të ditur numrin e  shqyrtimit të kundërvajtjeve me ligjin e ri nga periudha 1 janar 2018 deri më 9 janar 2018.

Sipas majorit, Jeton Rexhepi gjatë kësaj periudhe janë shqiptuar gjithsej 7 mijë e 732 kundërvajtje në trafikun rrugorë.

Sipas të dhënave 7256 gjoba janë shqiptuar në vlerë deri në 500 euro. 4 gjoba për persona juridik apo në vlerë 2 mijë euro dhe 472 janë proceduar në gjykatë, transmeton Indeksonline.

Rexhepi gjithashtu ka bërë të ditur se gjatë kësaj periudhe janë shqiptuar edhe gjoba me pikë negative.

“Numri i tiketave të cilat janë shqiptuar për pikë negative janë 285 gjoba. Prej tyre 39 gjoba që kanë të bëjnë me një pikë negative, 189 gjoba me dy pikë negative dhe 57 gjoba me tre pikë negative”, ka thënë Rexhepi.

Ndërsa, gjithashtu gjatë kësaj kohe 81 shofer janë ndëshkuar me ndalim drejtimi të automjetit me veprim motorik për periudha të ndryshme kohore.

“73 shoferëve i është ndaluar drejtimi i mjetit për tre muaj; 2 shoferëve i është ndaluar drejtimi i automjetit prej tre deri në gjashtë muaj; 4 shoferëve për gjashtë muaj; Një shoferi  6 deri në 12 muaj dhe një tjetri prej 9 deri në 18 muaj”, ka sqaruar më tej ai.

Ndryshe, ai ka apeluar për kujdes të shtuar në trafik, për shkak të aksidenteve të mëdha./Indeksonline/