Policia nis hetimet për lëshimin në qarkullim të Urës së Badocit pa testim, intervistohet një person

Policia e Kosovës ka nisur hetimet pas dyshimeve se Ura e Badocit është lëshuar për qarkullim pa u kryer testimi final, shkruan gazeta online Reporteri.net.

Policia e njoftuar se për këtë rast është intervistuar një i dyshuar. Rasti është cilësuar si “mbikëqyrje e pandërgjegjshme e trafikut publik”.

“Badovc, Magjistralja Prishtinë-Gjilan / 31.12.2024 – 10:00. Policia e Kosovës pas pranimit të autorizimit nga gjykata dhe pas ndërmarrjes së veprimeve hetimore ka konfirmuar se një urë është lëshuar për qarkullim pa përfunduar testimi final. Në koordinim me prokurorin është intervistuar një i dyshuar mashkull kosovar. Në konsultim me prokurorin rasti vazhdon në procedurë të rregullt”, thuhet në raporton 24 orësh të Policisë së Kosovës.

Më 31 dhjetor të vitit 2024, ura mbi Liqenin e Badocit u lëshua për qarkullim, por pa testim paraprak. Nga kompania “DRENI INGINERING” e cila është përgjegjëse për kryerjen e testimit, kishin deklaruar e ura është hapur për qarkullim për shkak të festave të fundvitit.

Në fillim të muajit edhe vet, zëvendësministri i Infrastrukturës, Hysen Durmishi,  kishte konfirmuar se ura e re mbi Liqenin e Badocit u lëshua në qarkullim pa u testuar.

“Ura e Badocit ështe projektuar e ndertuar me standardet më te larta të projektimit e ndertimit. Gjatë të gjitha fazave janë kryer inspektimet profesionale, përfshirë ketu atestet parakrake të materialeve, testimet të vazhdueshme të betonit e armaturës deri në finalizimin e saj. Prandaj me përgjegjësi të lartë profesionale deklaroj se Ura e Badocit është shumë stabile. Gjatë gjithë këtyre diteve aty kan kaluar shumë makineri me pesha të rënda pa asnjë problem për Urën, e këtë do ta dëshmojë edhe testimi formal që do të bëhet nesër”, kishte shkruar Durmishi.

Testimi i urës që ka gjatësi rreth 40 metra, ishte paraparë në aneks kontrate të cilën Ministria e Infrastrukturës e nënshkroi kur punimet ishin në fazën fillestare. Sipas paramasës, vetëm testimi i urës do të kushtojë 6000 euro. /Reporteri.net/