Policia jep detaje për arrestimin e të dyshuarve për grabitjen në argjendarinë në Suharekë

Dy persona janë arrestuar sot, pasi të njëjtit dyshohet se janë përfshirë në rastin e grabitjes së armatosur në argjendarinë ‘Diakos’ në Suharekë, ku si pasojë e konfrontimit mes grabitësve dhe Policisë, ka mbetur i plagosur një zyrtar policor, raporton Gazeta Sinjali.

Zëdhënësi i Policisë së Kosovës, Baki Kelani, tha për Sinjalin se të arrestuarit  dyshohet se janë përfshirë në ndihmë të kryerjes së veprës penale të grabitjes në Suharekë.

“Të dyshuarit, tanimë të arrestuar janë shoqëruar në stacion policor për intervistim dhe procedura të mëtejme”, tha Kelani, teksa shtoi se Policia po vazhdon të kryejë hetime intensive për arrestimin e të gjithë personave të përfshirë në rast.

Ndërsa Prokurorja e Shtetit, Ervehe Gashi, konfirmoi për Sinjalin se ka udhëruar ndalimin e të dyshuarve.

“Interesi i hetimit është sa më pak informata aq më mirë, nuk janë grabitësit por ndihmësit. Dy persona janë arrestu. Të dy janë në ndalim. Jemi në identifikim e sipër të të dyshuarve tjerë”, tha shkurtimisht prokurorja Gashi.

Ndryshe, gjatë ditës së djeshme u gjet vetura e të dyshuarve, e cila ishte braktisur në një bjeshkë.

Sinjali mëson se automjeti me të cilin ata kanë arritur të arratisen, me targa të vjedhura të rajonit të Prishtinës “01”, që sipas pamjeve duket të jetë e tipit “Chevrolet Cruze” u gjet në një bjeshkë.

Nga Policia e kanë konfirmuar se të akoma nuk është zbuluar identiteti i të dyshuarve, por hetimet për identifikimin dhe lokalizimin e vendndodhjes së tyre po vazhdojnë.

Gjithçka dyshohet se ndodhi para orës 16:00, kur të dyshuarit ia mësynë argjendarisë, e cila ndodhet në rrugën “Brigada 123”, zbritën nga një veturë, të maskuar e të armatosur dhe tronditën punëtorin që ndodhej brenda.

Hajnat po dyshohet se kanë lidhur me rrip punëtorin e argjendarisë dhe nisën t’i zbrazin raftet e mbushura me stoli të arit ashtu siç e kishin planifikuar, teksa njëri prej tyre po bënte roje jashtë lokalit me kallashnikov, duke i tmerruar qytetarët në pikë të ditës.