Policia jep detaje për aksionin kundër fajdeve në Gjilan: E dëmtuan viktimën 600 mijë euro, e detyruan ta mbyllë dhe ta shes kompaninë

Policia e Kosovës ka dhënë detaje lidhur me aksionin kundër fajdeve që ka zhvilluar dje në Gjilan, ku janë arrestuar dy të dyshuar.

Policia në raportin 24 orësh thotë se të dyshuarit në vazhdimësi kanë ushtruar presion dhe kërcënime ndaj viktimës me qëllim të marrjes se interesit nga veprimtaria e fajdesë duke e detyruar të njëjtën të veprojë në dëm të pasurisë se tij dhe si rezultat i veprimeve të kundërligjshme të dyshuarit i kanë shkaktuar dëme materiale viktimës në vlerën mbi 600 mijë euro, duke e detyruar viktimën që ta mbyllë dhe ta shes kompaninë e tij, shkruan Reporteri.net.

Lidhur me rastin janë sekuestruar tri vetura, motorë sportiv, armë dhe municion, kartëmonedha euro, dokumente të ndryshme si dhe dëshmi tjera materiale të cilat do të përdoren në procedurën penale ndaj të dyshuarve.

 “Gjilan, 2023/2024. Drejtoria për Hetimin e Krimit të Organizuar dhe Krimeve të Rënda pas ndërmarrjes se veprimeve hetimore në bashkëpunim me Prokurorinë Speciale të Republikës se Kosovës, më 21.06.2024 ka filluar realizimin e operacionit policor për arrestimin e personave të dyshuar të përfshirë në veprat penale ‘Fajde’ dhe ‘Detyrim’. Gjatë hetimit të këtij rasti janë gjetura prova, se të dyshuarit kanë kryer veprat penale të ‘fajdesë’ dhe ‘detyrimit’ për të cilat janë hetuar. Të dyshuarit në këtë rast në vazhdimësi kanë ushtruar presion dhe kërcënime ndaj viktimës me qellim të marrjes se interesit nga veprimtaria e fajdesë duke e detyruar të njëjtën të veprojë në dëm të pasurisë se tij dhe si rezultat i veprimeve të kundërligjshme të dyshuarit i kanë shkaktuar dëme materiale viktimës në vlerën mbi 600.000 euro, duke e detyruar viktimën që ta mbyllë dhe ta shes kompaninë e tij. Gjatë këtij operacioni janë arrestuar 2 të dyshuar meshkuj kosovarë, ndërsa lidhur me rastin janë sekuestruar tri vetura, motorë sportiv, armë dhe municion, kartëmonedha euro, dokumente të ndryshme si dhe dëshmi tjera materiale të cilat do të përdoren në procedurën penale ndaj të dyshuarve. Me vendim të prokurorit, të dyshuarit janë dërguar në mbajtje”, thuhet në raportin e policisë.

Policia e Kosovës djet ka arrestuar dy persona në Gjilan nën dyshimin e veprës penale të “Fajdës dhe Detyrimit”. Mefail dhe Edonis Shkodra u arrestuan sot, ndërsa një person i tretë i njohur si Albert Malisheva, është ende në kërkim si të dyshuar për të njëjtin rast.

Jeta e luksoze e “fajdexhinjve”

Jeta luksoze e të dyshuarve është e dukshme nga profilet e tyre në rrjetet sociale. Makinat e shtrenjta, orët e kushtueshme, veshjet e markave të njohura dhe aksesorët prej ari janë të ekspozuara në postimet e tyre. Të dyshuarit Mefail dhe Edonis Shkodra, veçanërisht, janë të njohur për pasionin e tyre për makina që kushtojnë qindra mijëra euro. Orët që mbanin në duar kushtonin jo më pak se €1,000 secila.

Pas arrestimit, babai dhe biri u ndaluan me urdhër të Prokurorit për 48 orë.

“Gjatë operacionit policor në cilësi të provave materiale janë sekuestruar tri vetura, motorë sportiv, armë dhe municion, kartëmonedha euro, dokumente të ndryshme si dhe dëshmi tjera materiale të cilat do të përdoren në procedurën penale ndaj të dyshuarve”, njoftoi PK.

Edhe Albert Rexhepi, i njohur si Albert Malisheva, gjithashtu bënte një jetë të madhe luksoze. Makina të shtrenjta, orë të markave më luksoze dhe pushime në vende të ndryshme janë të përhershme në postimet e tij në rrjetet sociale.

Të dyshuarit me “qëndrime” të ndryshme politike

Bazuar në fotografitë e shpërndara në rrjetet sociale, të dyshuarit për fajde, Mefail Shkodra dhe Albert Malisheva kishin simpati për parti të ndryshme politike.

Shkodra ishte simpatizant i Lëvizjes Vetëvendosje të Kryeministrit Albin Kurti dhe në një foto shfaqej përkrah tij dhe presidentes Vjosa Osmani e burrit të saj, Prindon Sadriu. Ndërsa Albert Malisheva ishte një mbështetës i Lidhjes Demokratike të Kosovës (LDK) dhe publikonte fotografi në mbështetje të partisë që drejtohet nga Lumir Abdixhiku. Ai shprehte mbështetje edhe për nënkryetarin e LDK-së, Lutfi Haziri.

7 persona u arrestuan për fajde në tri rajone të Kosovës

Ministri i Punëve të Brendshme, Xhelal Sveçla, ka publikuar pamjet e operacioneve policore kundër fajdeve dhe detyrimit, të cilat Policia e Kosovës i realizoi të enjten dhe të premten në disa rajone, ku bëri të ditur se janë arrestuar shtatë persona, të cilët nëpërmjet aktiviteteve kriminale kanë përfituar vlera milionëshe nga qytetarët përmes frikësimit dhe detyrimit fizik.

“Në rajonin e Prishtinës, Pejës dhe Gjilanit, Policia e Kosovës ka realizuar dje dhe sot operacione në luftimin e aktiviteteve kriminale të fajdes dhe detyrimit”, ka shkruar Sveçla.

“Deri më tash janë arrestuar 7 persona, të cilët përmes aktiviteteve kriminale kanë përfituar vlera milionëshe nga qytetarët tanë përmes frikësimit dhe detyrimit fizik”, ka thënë ai.

“Toleranca ndaj kriminaliteteve si fajdeja e haraçi dhe çdo fenomeni të dëmshëm për qytetarët dhe shoqërinë tonë ka përfunduar. Do ta vazhdojmë pa u ndalur dhe pa kompromis luftën ndaj çdo ilegaliteti në Republikën tonë”, ka shkruar ai.

“I lus dhe inkurajoj të gjithë qytetarët që të bashkëpunojnë me institucionet e sigurisë që askush të mos jetë viktimë e individëve apo organizimeve kriminale”.