Policia gjen një veturë të mbushur me armatim në parkingun e një hoteli në Banjskë, arrestohen dy punëtorë të hotelit

Policia e Kosovës ka arrestuar dy persona në një hotel në Banjskë të Zveçanit, të cilët dyshohen për armëmbajtje pa leje.

Zëdhënësi i Policisë së Kosovës për veri, Veton Elshani, i tha gazetës online Reporteri.net se dy të dyshuarit, punonjës të këtij hoteli, u arrestuan pasi në parking të hotelit u gjend një veturë e mbushur me armë.

I pyetur se a dyshohen për përfshirje në sulmin terrorist ndaj Policisë së Kosovës, Elshani tha se njëherë jo, por se hetimet vazhdojnë.

“Dyshohen vetëm për armëmbajtje pa leje, por hetimet do të vazhdojnë”, tha Elshani.

Ndryshe, një grup terrorist ka sulmuar Policinë e Kosovës në veri në orët e para të mëngjesit.

Në kundërpërgjigje, policia raportohet se ka eleminuar katër terroristë, ndërsa ka arrestuar dy të tjerë, duke përfshirë arrestimin edhe të katër civilëve të cilët janë kapur në posedim të radiolidhjeve.

Ata dyshohet se kanë asistuar grupin e armatosur gjatë kohës kur Policia e Kosovës ishte vënë në ndjekje të tyre.

Aktualisht, situata në veri të vendit raportohet të jetë e qetë.