Policia e Kosovës raporton lidhur me një rast të cilësuar si vrasje në tentativë në Podujevë

Policia e Kosovës, të hënën, ka raportuar lidhur me një rast të cilësuar si vrasje në tentativë, në rrugën “Fahri Fazliu” në Podujevë.

Sipas PK-së, pas të shtënave me armë zjarri, ekipet e Policisë kanë dalë në vendin e ngjarjes, ku thuhet se kanë hasur në një veturë të dëmtuar, raporton “Betimi për Drejtësi”.

Bazuar në raport, dy persona thuhet të jenë tashmë në trajtim në Spitalin e Prishtinës.

Tutje, PK bën të ditur gjithashtu se tre persona të dyshuar dhe një i dyshuar i katërt të cilit nuk i dihet identiteti, janë larguar nga vendi i ngjarjes në drejtim të panjohur.

“Rr.Fahri Fazliu, Podujevë 31.08.2020, 20:17. Është raportuar për të shtëna me armë zjarri ku njësitë policore kanë dalur në vendngjarje dhe kanë hasur në një veturë e cila ka qenë e dëmtuar. Më pas është konfirmuar se dy persona janë në tretman mjekësor në Qendrën e Mjekësisë Familjare-Podujevë dhe të njëjtit më pas janë dërguar në Spitalin e Prishtinës për tretman të mëtutjeshëm. Tre personat e dyshuar meshkuj kosovarë dhe i dyshuari  katërt të cilit nuk i dihet identiteti janë larguar nga vendi i ngjarjes në drejtim të panjohur”, thuhet mes tjerash në raportin e Policisë së Kosovës.

Si përfundim, sipas të njejtit raport thuhet se me vendim të prokurorit është bastisur shtëpia e të dyshuarve, por nuk është gjetur asgjë e dyshimtë.

Gjithashtu, bëhet e ditur se është arrestuar një person, i cili dyshohet se ka shtënë në ajër me armë zjarri dhe e njëjta armë është konfiskuar.