Policia arreston 6 persona në Podujevë

Pengimi apo ndalimi i kryerjes së ceremonive fetare përbën vepër penale dhe kushdo që vepron në mënyrë të tillë të kundërligjshme mund të dënohet me gjobë ose me burgim. Për një rast të tillë, që dyshohet se ndodhi në xhaminë e fshatit Bellopojë të Podujevës janë prangosur gjashtë persona, raporton Gazeta Sinjali.

Rasti ka ndodhur sot, kur të dyshuarit, për motive akoma të panjohura tentuan të ndalojnë imamin për të kryer namazin e xhumasë.

Burimet brenda Prokurorisë kanë bërë me dije se personat e arrestuar janë: S. M, A. M, A. E, Sh. S, K. A, dhe B. R.

Të njëjtit janë arrestuar posa Policia ka intervenuar në vendin e ngjarjes dhe më pas janë shoqëruar në stacion policor për intervistim.

Pas përfundimit të procedurave policore, Prokurori i Shtetit ka urdhëruar masën e ndalimit policor dhe nisjen e hetimeve nën dyshimet se kanë kryer veprën penale “Pengimi i ceremonive fetare”.

Ndryshe, lidhur me rastin ka reaguar edhe Këshilli i Bashkësisë Islame në Podujevë, që njoftoi shkurtimisht për detajet e incidentit për çka kërkuan ndihmën e Policisë.

“Këshilli i bashkësisë Islame në Podujevë, falenderon policinë e shtetit për bashkpunimin dhe parandalimin e situatave të pa këndshme, duke iu përgjigjur kërkesës së Bashkësisë Islame të Podujevës”, thuhet në një njofitm.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.