Podujevë: Vendosen flamujt e UÇK-së dhe flamujt kombëtar nga rrethi i Shqiponjës deri në Merdar nga veteranët e UÇK-së

Kryetari i Organizatës së Veteranëve të Luftës së UÇK-së në Podujevë, Rafet Llapashtica, ka bërë të ditur se sot, së bashku me bashkëluftëtarë, ka nisur vendosjen e flamujve të UÇK-së dhe atyre kombëtar në hyrje të Podujevës.

Sipas Llapashticës, flamujt janë vendosur përgjatë segmentit nga rrethi i Shqiponjës deri në pikën kufitare të Mërdarit, si shenjë nderimi dhe respekti për festat e nëntorit dhe për të gjithë ata që sakrifikuan për lirinë e vendit.

“Sot me bashkëluftëtar filluam vendosjen e flamujve të UÇK-së dhe atyre kombëtar nga rrethi i Shqiponjës deri në pikën e Mërdarit në Podujevë me rastin e festave të nëntorit”, ka shkruar ai.

Vendosja e flamujve tashmë është bërë traditë në Podujevë, duke shënuar atmosferën festive dhe ndjenjën patriotike që karakterizon këtë periudhë të vitit.