Podujevë: Tre muaj burgim me kusht dhe 200 euro gjobë, pranoi se tentoi ta sulmonte nënën me kaçavidë

I akuzuari N.N është dënuar me 3 muaj burgim me kusht dhe 200 euro gjobë pasi pranoi se tentoi të sulmonte nënën e tij me kaçavidë pas një mosmarrëveshje që kishte me të lidhur me 6 cigare.

Aktgjykimi ndaj të akuzuarit u shpall të premten në Gjykatën Themelore në Prishtinë, dega Podujevë.

Dënimi me kusht, të njëjtit nuk do t’i shqiptohet në afat verifikimi prej një viti, ndërsa dënimin prej 200 euro gjobë obligohet ta paguajë pas plotfuqishmërisë së aktvendimit, raporton “Betimi për Drejtësi”.

I akuzuari ngarkohet edhe me shpenzimet e procedurës penale dhe atë 20 euro në emër të paushallit gjyqësor dhe 30 të tjera në emër të kompensimit të viktimave të krimit.

Para shpalljes së aktgjykimit, i akuzuari e pranoi veprën penale për të cilën ngarkohet dhe tha se pendohet për të.

“Pendohem për këtë vepër penale, i kërkoj falje nënës, e pranoj fajësinë. Kërkoj nga gjykata dënim sa më të butë dhe premtoj se nuk do të përsëritet vepra penale”, deklaroi N.N.

Pranimin e fajësisë nuk e kundërshtoi prokurori Ali Ajdini dhe më pas e aprovoi gjykatësi Gazmend Bahtiri.

Edhe e dëmtuara R.R, tha se nuk dëshiron të dënohet djali i saj, si dhe shtoi se nuk kërkon kompensim.

Ndërkaq, mbrojtësi i tij i caktuar sipas autorizimit, avokati Mahmut Hoti tha se pajtohet me pranimin e fajësisë së të mbrojturit të tij, duke shtuar më pas se kërkon masë më të butë për klientin e tij dhe se në rast se një vepër e tillë përsëritet kërkon që i njëjti të dërgohet në institucion shëndetësor për ekzaminim.

Ndërkaq, lidhur me kërkesën e Prokurorisë Themelore në Prishtinë për caktimin e kërkesës së paraburgimit, të përpiluar nga prokurorja Mimoza Shala, së bashku me aktakuzë, prokurori Ali Ajdini që e përfaqësoi këtë aktakuzë-kërkesë në gjykatë.

Prokurori tha se e ndryshon kërkesën nga masa e paraburgimit në masën e paraqitjes në stacion policor. Por, kërkesa u refuzua nga gjykata.

Sipas aktakuzës-kërkesës, më 15 shtator 2021 në shtëpinë e tij, i pandehuri N.N pas një mosmarrëveshje paraprake me nënën e tij, tani e dëmtuara R.R, me të cilën jeton, në ditën kritike i kishte kërkuar nënës së tij 6 copë cigare dhe pasi e dëmtuara nuk ia kishte dhënë sepse nuk kishte llojin e cigareve që atij i pëlqen, i pandehuri nga kati i parë i shtëpisë kishte zbritur me një kaçavidë dhe kishte tentuar ta sulmojë nënën e tij, por kanë ndërhyrë antarët e tjerë të familjes.

Me këtë, ai akuzohet se ka kryer veprën penale “dhuna në familje” në tentativë, nga neni 248 par.3 nënpar. 3.1 dhe 3.2 lidhur me par.2 dhe lidhur me nenin 28 të Kodit Penal, vepër e cila dënohet me gjobë dhe me burgim deri në tre vjet. /BetimipërDrejtësi