Podujevë: Transferet e stafit civil në komunë, reagon kryetari i LDK-së Ekrem Hyseni

Kryetari i Podujevës, Shpejtim Bulliqi ditëve të fundit ka marr disa vendime lidhur me transferet brenda stafit komunal çka ka shkaktuar paknaqësi të mëdha bernda komunës, njofton PodujevaPRESS.net

Sipas burimeve të PodujevaPRESS deri më tani nga këto vendime janë prekur mbi 20 persona nga stafi I shërbyesve civil.

E pikërisht për këtë ka reaguar edhe kryetari i LDK-së në Podujevë, Ekrem Hyseni.

Hyseni në reagimin e tij ka thënë se “Qeverisja e proklamuar si e ndryshimit që nga dita e parë e këtij mandati ka harruar të fillojë me punë, por është duke përdorur pushtetin si mekanizëm të përndjekjes dhe qërimit të hesapeve personale e politike me shërbyesit civilë”.

Kryetari i LDK-së ka thënë poashtu se “duke parë gjithë këto zhvillime të turpshme të papranushme dhe të patolerueshme, ftoj edhe sindikatat e punëtorëve të reagojnë, e të mos lejojnë nepërkëmbjen e anëtarëve të tyre, gjë të cilën e kanë edhe obligim”.

Ky është reagimi i tij:

Të nderuar qytetarë,

Qeverisja e proklamuar si e ndryshimit që nga dita e parë e këtij mandati ka harruar të fillojë me punë, por është duke përdorur pushtetin si mekanizëm të përndjekjes dhe qërimit të hesapeve personale e politike me shërbyesit civilë.

Njejt është vepruar edhe me punëtorët e arsimit dhe shëndetësisë, por ajo që ka kaluar në përmasa shqetësuese është gjendja e krijuar në komunë, ku punëtorët e administratës, po degradohen e poshtrohen përditë. Ata po ndëshkohen dhe transferohen pa kurrfarë baze dhe në kundërshtim të plotë me rregullativën ligjore për këtë çështje.

Si askund tjetër, në qeverisjen e LVV në Podujevë, zyrtari që deri dje ka shërbyer në sektorin e shëndetësisë, tranferohet në inspeksion, inxhinieri në kulturë, zyrtari i lartë në pranues të ankesave, zyrtari i prokurimit në gjendje civile, inxhinierët në zyrën pritëse, ndërsa zyrtarët e shërbimeve publike, konvertohen në inspektorë të ndërtimit e ambientit.

Se kemi të bëjmë me paranoja, hakmarrje e ndëshkim e dëshmon fakti se këto vendime po nxirren direkt me nënshkrimin e kryetarit të komunës, e jo sipas procedurave që parashihen me Ligj.

Si pasojë e këtyre veprimeve po ndodhin edhe ndryshime të shpeshta në ekzekutiv.

Njerëzit e vullnetit të mirë po ikin duke mos pranuar të bëhen marioneta të kësaj kaste famkeqe, e cila përmes presionit, e shantazhit ndaj shërbyesve civil po mundohet t’i kryej obligimet e dhëna në netët e fundit të fushatës.

Llapi nuk ka qytetarë të rendit të parë dhe të dytë, ata janë të barabartë dhe të respektuar.

Prandaj, njerëzit e ndershem, shërbyesit civilë, punëtorët e arsimit e shëndetësisë nuk e pranojnë këtë, të jeni i bindur!

Andaj, duke parë gjithë këto zhvillime të turpshme të papranushme dhe të patolerueshme, ftoj edhe sindikatat e punëtorëve të reagojnë, e të mos lejojnë nepërkëmbjen e anëtarëve të tyre, gjë të cilën e kanë edhe obligim.

Ne garantojmë se do të jemi në dispozicion dhe në përkrahje të punëtorëve të sektorit publik. Ndërsa faktet që posedojmë, mbi procedurat e zhvilluara nëpër drejtori, e deri te nxjerrja e vendimeve për ndëshkim e transferim do t’i dorëzojmë edhe në organet e rendit, sepse ato flasin për shkelje të rënda.

Në këtë angazhim, ftojmë edhe mediat dhe shoqërinë civile të bëhen pjesë, duke luftuar për një administratë publike efikase dhe të pavarur nga secili ndikim.

Bashkë me secilin person që është objekt i kësaj ndërmarrje të frikshme antiligjore dhe me kolegët e tyre, të cilët ky fat i pret nesër nuk do të lëmë formë të reagimit pa përdorë, në mënyrë që të mbrohet integriteti i punëtorëve të sektorit publik.