Podujevë: Të premten pritet të miratohet harta zonale

Zyrtarët komunalë të Podujevës kanë paralajmëruar se propozim-vendimi për miratimin e hartës zonale do të miratohet këtë muaj.

Në një njoftim të Zyrës për informim të Komunës, thuhet se kjo është bërë e ditur në takimin që zyrtarët komunalë e kanë mbajtur me asamblistët.

Gjatë këtij takimi, kryetari i Komunës, Shpejtim Bulliqi, ka kërkuar nga këshilltarët komunalë që ta votojnë këtë dokument.

“Kryetari Bulliqi potencoi se Harta Zonale përcakton kushtet zhvillimore dhe ndërtimore dhe u ka bërë thirrje të gjithë asamblistëve ta mbështesin këtë dokument, për të cilin ka thënë se rëndësia e tij është e domosdoshme për planifikimin hapësinor dhe zhvillimin komunal të Komunës sonë”, thuhet në njoftim.

Sipas njoftimit., drejtori për Planifikim Urban dhe mbrojtje të Mjedisit, Leutrim Krasniqi, tha se Harta zonale e përcakton destinimin dhe shfrytëzimin e pronës publike e private në tetë vjetët e ardhshëm.

“Të pranishmit në detaje për Hartën Zonale i ka informuar drejtori i Planifikimit Urban dhe Mbrojtje e Mjedisit, Leutrim Krasniqi, i cili ka elaboruar në tërësi Hartën Zonale, për të cilën ka thënë se është dokument multisektorial që përcakton detajisht llojin, destinimin dhe shfrytëzimin e planifikuar të hapësirës publike dhe private në territorin e Komunës së Podujevës për një periudhë 8 vjeçare”, thuhet tutje në njoftim.

Zyrtarët komunalë kanë thënë se propozim-vendimi për miratimin e Hartës Zonale të Komunës së Podujevës pritet të votohet më 29.04.2022.