Podujevë: Në 14 vjetorin e Pavarësisë nderohen heronjtë dhe mbahet seancë solemne e Kuvendit

Komuna e Podujevës për nder të ditës së Pavarësisë së Kosovës, nën patronatin e kryetarit të Komunës, Shpejtim Bulliqi, ka mbajtur homazhe në nderim të dëshmorëve për të përkujtuar veprën dhe sakrificën e tyre në luftën çlirimtare të Kosovës.

Në homazhe kanë marrë pjesë kryetari Bulliqi, nënkryetarja Lahu, kryesuesi Hoxha, drejtorë të drejtorive, asamblistë të kuvendit, përfaqësues nga shoqatat e dala nga lufta dhe qytetarë.

Pas homazheve është mbajtur seanca solemne e Kuvendit Komunal, në të cilën kanë marrë pjesë përfaqësues të institucioneve, shoqata të luftës, familjarë të dëshmorëve etj. Në këtë seancë kanë mbajtur nga një fjalë rasti kryetari i Komunës, Shpejtim Bulliqi dhe kryesuesi i Kuvendit, Hilmi Hoxha.

Kryetari Bulliqi në fjalën e tij të rastit, ndër të tjera theksoi: “Pa dyshim shpallja e pavarësisë  së Kosovës, është çasti më kulminant i gjithë historisë së Kosovës. Ndaj, me ndjenjën e respektit të përjetshëm përulemi para të gjithë atyre burrave e grave të Kosovës, që me sakrificën e tyre sublime u bënë guri themeltar për lirinë, pavarësinë dhe demokracinë e vendit tonë”.

“Sot, kur jemi të lirë dhe të pavarur, Kosova jonë nuk ka nevojë më që ta japim jetën për të, siç bënë gra e burra në përiudha të ndryshme historike, por ka nevojë për punën dhe angazhimin tonë të sinqertë, ka nevojë që asaj t’i japim më të mirën nga vetja jonë, e mbi të gjitha ka nevojë për dashurinë tonë”.

Ndërsa kryesuesi Hilmi Hoxha në fjalën e tij të rastit theksoi: “Rruga e Kosovës drejt lirisë dhe pavarësisë ishte e gjatë dhe me shumë sakrifica, andaj në këtë ditë kur shënojmë datëlindjen e 14-të të Pavarësisë së Kosovës, duhet të kujtojmë të kaluarën tonë e të punojmë me përkushtim të madh ta konsolidojmë lirinë dhe demokracinë e vendit tonë”.

Pas seancës solemne, u mbajt koktej në hollin e Kuvendit me të pranishmit.