PODUJEVË: Miratohet buxheti për vitin 2021 por shoqëria civile e opozita konsiderojnë se janë shpërfillur procedurat

Përfaqësues të organizatës Sundimi i Demokracisë në Kosovë (SDK) dhe ata të dy partive opozitare LVV e PDK po konsiderojnë se qeverisja lokale në Podujevë i ka shkelur procedurat që duhet ndjekur për projekt-buxhetin para se të dërgojë në Kuvend për miratim. I njëjti është miratuar të mërkurën pa votat e këtyre dy partive opozitare. Këshilltarja Lirika Maliqi (LVV), ka thënë se ekzekutivi nuk ka pasur guxim të ballafaqohet me qytetarët, para se të miratojë buxhetin për vitin 2021.

“Ky buxhet paraqitet nga një ekzekutiv i pazgjedhur nga vota e qytetarëve dhe mbahet në këtë karrige të uzurpuar nga kapësit e shtetit Ky buxhet është në vazhdën e kësaj logjike qeverisëse të papërgjegjshme që për afër katër vite, apo më mirë të themi që nga paslufta, nuk arrin që të bëjë politika prioritare zhvillimore për komunën tonë. Buxheti për këtë vit është i ndërtuar dobët në çdo aspekt të tij. E për më keq, është hartuar një projektbuxhet duke mos përfillur procedurat e planifikimit dhe duke mos u konsultuar fare me qytetarët, gjë që implikon drejtpërsëdrejti shkeljen e procedurave ligjore për transparencë dhe llogaridhënie”, është shprehur Lirika Maliqi. “Mirëpo është e qartë se ky është një buxhet elektoral dhe një buxhet dëshirash. Nuk keni pasur guxim për ballafaqim me qytetarët sepse ka shumë projekte të cilat nuk mund të realizohen brenda një viti e kjo bëhet për të mashtruar qytetarët për projekte. Jo kot nuk i specifikoni rrugët nëpër fshatra e qytet, sepse një gjë e tillë është shumë relative, kur vjen puna tek vota, aty vendosni se cilat lagje do t’i privilegjoni me asfalt, e pastaj t’i shtantazhoni për votë”.

Këshilltarja e Vetëvendosjes ka theksuar se Komuna e Podujevës nuk i posedon disa dokumente, siç është Plani zhvillimor urban.

“Pa këtë dokument nuk di se si vendos komuna për projektet infrastrukturore, kur dihet se çdo projekt, çdo ndërtim, qoftë investim privat, qoftë publik, duhet të jetë në përputhje me këtë dokument zhvillimor e që kjo qeverisje kuturu asnjëherë që nga paslufta nuk e ka përpiluar një plan zhvillimor urban. Ky pushtet vazhdon me logjikën e gabuar ku pjesën dërmuese të investimeve i orienton në asfalt, rrugë të ndërtuara pa plan, pa analizë fizibiliteti dhe të punuara dobët”, ka thënë këshilltarja Maliqi.

Sipas saj, për vitin 2021 ende flitet për meremetimin e rrugëve me zhavorr.

“A do të subvencionohet kultura, rinia apo sporti, sepse një shumë prej 40,000 vështirë se i mbulon tri fushat? Nuk keni parashiku subvencione për ndërmarrje të vogla dhe të mesme. 25,000 euro për kanalizim ndoshta është mirë drejtori të sqarojë se çka do të bëjë me to, nëse veç mundet të bëjë diçka me to sepse me një planifikim të tillë leni përshtypje se Podujevën po e llogaritni si një fshat të vogël”, ka theksuar ajo.

Ajo ka kërkuar që çdo vit të ndahen nga 500 mijë euro për subvencionimin e bizneseve prodhuese (të subvencionohen 10% e makinerive të blera me qëllim të instalimit të linjave të reja prodhuese), 500 mijë euro për renovimin e shkollave, 1 milion euro për ndërtimin e shtëpisë së kulturës dhe 100 mijë euro për funksionalizimin e mjekësisë së patronazhit. Por, asnjëra nga këto nuk janë marrë parasysh nga ekzekutivi komunal.

Edhe këshilltari i PDK-së, Bashkim Syla, ka thënë se projekt-buxheti nuk mirë i përgatitur dhe se nuk janë përfillur as procedurat.

“Si vitet e kaluara prioritet i kësaj qevevrie ka qenë urbanizmmi dhe infrastruktura publike duke lënë anash investimet në arsim dhe shëndetësi. Në këtë projekt-buxhet në urbanizëm dhe infrastrukurë janë planifikuar mbi 5,000,000 euro, kurse në arsim 232,026 euro dhe shëndetësi 566,930 euro. Ky projekt-buxhet nuk është ndërtuar mbi bazën e planifikimit dhe Strategjisë së zhvillimit ekonomik që është miratuar vitin e kaluar në këtë Kuvend. Te Drejtoria e Infrastrukturës nuk janë të paraqituara projektet mirë me detaje”, ka thënë këshilltari Syla. “Ndërtimi i trotuareve, ndriçimi publik, ndërtimi i urave janë përfshirë deri në dhjetra fshatra si dhe shuma që do të investohet në total pa u specifikuar rruga, fshati dhe sa do të investohet për secilin fshat ose vendbanim. Te shëndetësia janë planifikuar 316,000 euro blerja e paisjeve mjekësore për QKMF. Është mirë të informohemi nga drejtori për çfarë paisje bëhet fjalë pasi që në Strategjinë e zhvillimit ekonomik lokal janë planifikuar të investohen në: 31 Shërbime laboratorike në QKMF, 27 Shërbime laboratorike në QMF, 6 Shërbime në AMF-të që do fillojnë shërbimet nga 1 janari i 2022”.

Ndërsa, bashkëpartiaku i tij, Rafet Llapashtica, i ka pyetur zyrtarët e ekzekutivit nëse e dinë se ku do të ndërtohet zona ekonomike për të cilën janë paaparë mjete për ndërtimin e infrastrukturës dhe po ashtu për ndërtimin e bibliotekës së qytetit. Sipas tij, këto përgjigje nuk i dinë as vetë drejtorët.

Në anën tjetër, drejtori për Shërbime Publike, Faik Muçiqi dhe ai për Planifikim Urban, Hamdi Jaha kanë thënë se kanë mbajtur dëgjime publike me qytetarë në muajin qershor. Sipas Muçiqit në Drejtorinë e tij, ka pak ndryshime nga planifikimi i asaj kohe. Ndërsa, drejtori Jaha, nuk ka treguar për lokacionin për zonën ekonomike, por ka thënë se pas miratimit të hartës zonale, Komuna ka të drejtë të bëjë shpronësime. Kurse, drejtoresha për Kulturë, Donika Sfishta, ka thënë se objektin e ish-hotel Llapit do ta rinovojnë për bibliotekë.

Këshilltarët komunalë kanë dhënë edhe vërejtje tjera për projekt-buxhetin. Ky dokument është miratuar pa votat e LVV-së dhe PDK-së.