PODUJEVË: I akuzuari mohon se shtiu me armë në drejtim të kujdestarëve që ruanin Liqenin e Batllavës

I akuzuar nga prokuroria se në prill të vitit 2015, kishte shtënë me armë në drejtim të barkës së kujdestarëve që ruanin Liqenin e Batllavës, i akuzuari Bashkim Zymberi, të mërkurën e mohoi se ka bërë një gjë të tillë.

Një deklarim të tillë, Zymberi i cili po akuzohet për shkaktim të rrezikut të përgjithshëm dhe armëmbajtje pa leje, e dha me rastin e marrjes së tij në pyetje, të mërkurën në Gjykatën Themelore në Prishtinë.

Lidhur me veprën penale të armëmbajtjes pa leje, Zymberi e kishte pranuar fajësinë në seancat e kaluara, raporton “Betimi për Drejtësi”.

Kurse, sa i përket akuzave se i njëjti kishte shtënë me armë në drejtim të të dëmtuarve në këtë rast, Enver Zeka dhe Bekim Vërsheci, i akuzuari Zymberi tha se në natën kritike kur kishte ndodhur ngjarja, nuk kishte qenë fare në Liqenin e Batllavës, por kishte qenë, siç tha, në shtëpinë e tij në fshatin Baballan.

“Sa i përket veprës penale për të cilën po akuzona, s’kom çka t’thom, se as skom gjujt dhe at natë s’jam kon hiq aty”, deklaroi i akuzuari Zymberi.

Ndërsa, sa i përket të dëmtuarëve, Zeka dhe Vërshevci, i akuzuari Zymberi deklaroi se kishte pasur mosmarrëveshje me ta, pasi të njëjtit, sipas tij, kishin hedhur sprej në barkën e tij, me ç‘rast i kishin marrë edhe telefonin.

“Enver Zekën dhe Bekim Vërshevcin i njoh, me ta kam pasur problem para kësaj date se ata kanë gjuajtur sprej në barkën time dhe ma kanë marr telefonin”, shtoi i akuzuari.

Tutje, Zymberi e akuzoj të dëmtuarin Zeka, se është hajdut dhe se pikërisht ai po e akuzon Zymberin për çdo vjedhje që ai e kryen, me qëllim që t’a largojë policinë nga vetja.

“Rastin e kam lajmru në polici, so hera e parë që Enver Zeka po m’qon në polici. Ai vjedh vet ndërsa policia vjen tek unë, sepse kur e nxajn policia me presh n’dor, ai policinë mi qon mu, që me largu rastin prej vetit, sepse ka të afërm policë”, shtoi i akuzuari.

Pas përfundimit të marrjes në pyetje të të akuzuarit, seanca vazhdoi me paraqitjen e fjalës përfundimtare të palëve.

Prokurorja e rastit, Javorka Prilinçeviq, në fjalën e saj përfundimtare, kërkoi nga gjykata që të akuzuarin Bashkim Zymberi ta shpall fajtor, pasi siç tha, gjatë procedurës së administrimit të provave është vërtetuar që i njëjti ditën kritike ka qenë në Liqenin e Batllavës dhe ka kryer veprën penale shkaktim i rrezikut të përgjithshëm.

Tutje, prokurorja Prilinçeviq deklaroi se i akuzuari asnjëherë gjatë gjykimit nuk ka dhënë prova që e shfajësojnë atë nga veprat që i vihen në barrë dhe asnjëherë nuk është ballafaquar me dëshmitarët dhe provat që i kanë prezantuar ata.

Ndërsa, i akuzuari Zymberi në fjalën e tij përfundimtare deklaroi se e ndjen veten të pafajshëm për veprat që i vihen në barrë dhe i kërkoj gjykatës dënim më të butë.

Po ashtu, në seancën e së mërkurës, trupi gjykues i udhëhequr nga gjykatësja Shpresa Hasaj Hyseni, mori vendim që të lexohet deklarata e dhënë në polici më 12 prill 2015, nga ana e dëshmitarit Bekim Vërshevci , pasi i njëjti është i paarritshëm për gjykatën.

Pas përfundimit të marrjes në pyetje të të akuzuarit Zymberi dhe në mungesë të propozimeve të reja për plotësimin e procedurës së provave, trupi gjykues mori vendim që të tërhiqet për këshillim dhe votim.

Ndërsa, shpallja e aktgjykimit u caktua të bëhet më 1 nëntor 2018, me fillim nga ora 8:45.

Sipas aktakuzës së ngritur më 29 shtator 2017, Bashkim Zymberi akuzohet se më 13 prill 2015, rreth orës 20:30 minuta, në Liqenin e Batllavës, përderisa punëtorët kujdestar të Shoqatës Sportive, Rekreative të Peshkatarisë “Llapi” – tani të dëmtuarit Enver Zeka dhe Bekim Vërshevci, ishin duke kontrolluar Liqenin e Batllavës me barkë, ka shtënë në drejtim të barkës së tyre nga arma e panjohur e zjarrit pesë ose gjashtë herë, mirëpo, predhat nuk i kanë goditur të dëmtuarit, e pastaj sipas aktakuzës, i akuzuari me një person të panjohur është larguar nga vendi i ngjarjes.

Me këto veprimet të tij, prokuroria e ngarkon të akuzuarin Bashkim Zymberi se ka kryer veprën penale “Shkaktim i rrezikut të përgjithshëm” nga neni 365 par.1 të KPRK-së.

Tutje sipas akuzës, më 16 prill 2015, gjatë bastisjes në shtëpinë e të pandehurit në fshatin Ballaban, Komuna e Prishtinës, në bazë të urdhëresës së gjyqtarit të procedurës paraprake, janë gjetur armët e zjarrit – pistoleta e ngjyrës së zezë dhe një pushkë e gjuetisë, punim artizanal pa numër serik, për të cilat i pandehuri nuk ka pasur leje valide të lëshuar nga organet kompetente konform Ligjit për Armë, të cilat i janë konfiskuar përkohësisht nga ana e Policisë.

Me këto veprime, prokuroria e ngarkon të akuzuarin Bashkim Zymberi se ka kryer veprën penale “Mbajtja në pronësi, kontroll ose posedim të paautorizuar armëve” nga neni 374 par.1 të KPRK-së. /Betimipërdrejtësi