PODUJEVË: Dyshohet se i’a shtuan në vitin 2010 LDK-së 486 vota, tani të akuzuar (Foto)

Prishtinë – Gjashtë të akuzuarit për mashtrim me votime, Naim Mehmeti, Raif Pllana, Fadil Haziri, Adem Beka, Emir Maliqi dhe Agon Statovci, janë deklaruar të pafajshëm.

Në seancën fillestare të mbajtur të premten në Gjykatën Themelore në Prishtinë, të akuzuarit kanë mohuar fajësinë për akuzën me të cilën ngarkohen.

Gjykatësi Vesel Ismajli, i njoftoi të akuzuarit se pranimi i fajësisë është rrethanë posaçërisht, lehtësuese, por të akuzuarit e mohuan ta kenë kryer veprën penale.

“Unë 20 vjet e pranoj burgun nëse kena bo diçka, po votat s’jonë vjedh te na po kerri që i ka qu kutitë nga Batllava  ka bo dy orë deri në Mazgit”, deklaroi njëri nga të akuzuarit Fadil Haziri.

Seanca e radhës u caktua më 6 nëntor nga ora 13:00.

Sipas aktakuzës së ngritur nga Prokuroria Themelore në Prishtinë, të akuzuarit Naim Mehmeti, Raif Pllana, Fadil Haziri, Adem Beka, Emir Maliqi, Agon Statovci, dyshohet se kanë kryer veprën penale mashtrim me votime.

Siç thuhet në aktakuzë, më 22 dhjetor 2010, gjatë mbajtjes së zgjedhjeve për Kuvendin e Republikës së Kosovës në qendrën e vendvotimit në shkollën fillore “Shefki Kuleta” në fshatin Tërnavë, të Podujevës të akuzuarit në bashkëkryerje kanë falsifikuar rezultatet e zgjedhjeve, ashtu që  brenda një subjekti politik, kanë hequr vota për t’i shtuar subjektit tjetër dhe duke i regjistruar në mënyrë jo të saktë gjithsej 591 vota.

Siç pretendon Prokuroria këto vota iu janë shtuar kandidatëve të subjektit politik LDK 486, VV 62 dhe PDK 37 vota.

Me këto veprime, ata akuzohen se në bashkëkryerje kanë kryer veprën penale “mashtrim me votime”, nga neni 180 lidhur me nenin 23 të KPK-së.