PODUJEVË: Dënim unik me burg prej 2 vite e 6 muaj ndaj të akuzuarit për aksidentin me fatalitet rrugës për në Batllavë

Në Gjykatën Themelore në Prishtinë, dega Podujevë, është shpallë aktgjykimi dhe është dënuar me 2 vite e gjashtë muaj burg, i akuzuari V. J. për aksidentin e komunikacionit ku kishte humbur jetën një  vajzë e moshës 13 vjeç.

Dënimi i shqiptuar për dy vepra penale, rrezikim i trafikut publik dhe mosdhënie e ndihmës personit të lënduar në fatkeqësi komunikacioni, do të ekzekutohet pas plotfuqishmërisë së aktgjykimit, raporton “Betimi për Drejtësi”.

Në kuadër të këtij vendimi, do të llogaritet edhe koha e kaluar në paraburgim, nga data 09.11.2020 e deri më 09.01.2021.

I njëjti, është ngarkuar edhe me shpenzimet e procedurës penale dhe atë 81.76 euro për ekspertizën e komunikacionit, për paushallin gjyqësor 50 euro, si dhe për kompensimin e viktimave të krimit shumën prej 30 euro.

Familja e të ndjerës, të përfaqësuar nga avokati Agron Curri, për të realizuar kërkesën pasurore-juridike, janë udhëzuar në kontest të rregulltë juridiko-civil.

Me dënim plotësues, të akuzuarit në fjalë i është ndaluar drejtimi i automjetit në kohëzgjatje prej 2 viteve, ku nuk do të llogaritet koha e kaluar në dënim me burgim në kohëzgjatjen e dënimit plotësues.

Ky aktgjykim u shpall sot, pasi në seancën e datës 08.01.2021, i akuzuari J. e ka pranuar fajësinë.

Në të njëjtën ditë, pas leximit të aktakuzës nga prokurori Besart Mustafa, i akuzuari J. kishte thënë se i shprehë ngushëllime familjes së dëmtuar.

Ndryshe, sipas aktakuzës së datës 05.01.2021, Valton Jupolli akuzohet se me datën 09.11.2020, rreth orës 09:40, në rrugën Lluzhan- Batllavë, më konkretisht në fshatin Llugë, Podujevë, nga pakujdesia ka shkelur nenin 53 dhe 151 të Ligjit për Rregullat e Trafikut Publik, ka rrezikuar jetën e njerëzve, ngase derisa ishte duke drejtuar automjetin A “VË Passat”, duke mos e përshtatur shpejtësinë e lëvizjes me kushtet dhe rrethanat e rrugës në vendbanim, gjegjësisht në pjesën e rrugës ku shpejtësia e lëvizjes është e kufizuar 40 km/h, ka zhvilluar shpejtësinë prej 80 km/h dhe duke mos pasur kujdesin e duhur ndaj pjesëmarrësve të tjerë në trafik, duke lëvizur nga drejtimi i fshatit Lluzhan, në drejtim të fshatit Batllavë, dhe kur kishte arritur në fshatin Llugë, tek vendi i quajtur “Glloboder”, me pjesën e përparme të automjetit të anës së majtë e ka goditur këmbësoren (fëmijë), V.C ., e cila në momentin e aksidentit ishte duke e kaluar rrugën nga ana e majtë në anën e djathtë të drejtimit të lëvizjes së automjetit, ku si pasojë e këtij aksidenti këmbësorja V.C., ka marrë lëndime të rënda trupore dhe nga kalimtari i rastit-dëshmitari G. S. e kishte dërguar në Qendrën e Mjekësisë Familjare në Lluzhan, për të ia ofruar ndihmën mjekësore dhe prej aty V., është dërguar në QKUK në Prishtinë, në repartin e Emergjencës dhe pas trajtimit në repartin e Intensivës, me datën 28.11.2020, në ora 06:20, nga lëndimet e rënda që ka marrë si pasojë e aksidentit, V.C., ka ndërruar jetë.

Ndërsa, sipas dispozitivit të dytë të aktakuzës, i njëjti akuzohet se në datën, kohën dhe vendin e cekur si në dispozitivin e parë të aktakuzës, V. J. kur ka ndodhë aksidenti me automjetin A, ishte larguar nga vendi i ngjarjes, duke mos i ofruar ndihmë personit të lënduar, këmbësores V.C., dhe i njëjti fillimisht ishte shkuar në shtëpinë e tij dhe pas një kohe ishte paraqitur ne Stacionin  e Policisë në Podujevë.

Me këtë, ai akuzohet për veprat penale: “Rrezikim i trafikut publik” nga neni 370 par.9 lidhur me par.6 dhe par.1, si dhe veprën penale “mosdhënia e ndihmës personit të lënduar në fatkeqësinë e trafikut publik” nga neni 374 par.2 lidhur me par.1 të KPRK-së. /BetimipërDrejtësi