Vdes mamia llapjane Sanije Topanica, iu ndihmoi grave në lindje gjatë luftës
PODUJEVË: Çmimi i ulët i mjedrës demoralizon fermerët, nuk i nxorën as shpenzimet
Ulja e çmimit të mjedrës nga 1 euro e gjysmë sa ishte vitin e kaluar, në 80 cent, po shqetëson kultivuesit e kësaj kulture pemtare. Fermerët thonë se me çmimin aktual i mjedrës nuk sjellë fitime. Disa nga ta dyshojnë se pikat grumbulluese kanë marrëveshje të fshehta për çmimin, ndërsa këta të fundit e mohojnë një gjë të tillë duke thënë se çmimin e cakton tregu evropian ku edhe eksportohet mjedra.
Tomor Çitaku nga Komuna e Podujevës ka disa vite që merret me kultivimin e mjedrës. Ai këtë vit edhe pse i kënaqur me rendimentet e mjedrës, është shumë i zhgënjyer me çmimin e saj. Sipas tij, rënia e çmimit nga 1 euro e gjysmë, sa ishte vitin e kaluar në 80 cent, ka krijuar një situatë të rëndë e të pafavorshme për kultivuesit e mjedrës.
“Është mërzi koj puna e mjedrës, se na kanë shti në lojë, edhe tash po luajnë me neve. Këto pikat grumbulluese po mblidhen çdo ditë, po thonë po caktojnë çmimin, a na e dimë se, kur dy prodhues ose dy grumbullues bëhen bashkë për të caktuar çmimin, ajo është e pa ligjshme. Edhe kjo po tregon se shteti i jonë nuk është i interesuar me e mbrojt fermerin”.
Tomori duke folur për çmimin e ulët të mjedrës, thotë se në të kaluarën mjedra i sillte fitime të mira. Fitimet që sillte kultivimi i mjedrës, shtynë edhe Sami Shalën që të filloj kultivimin e mjedrës. Samiu tregon për Radio Kosovën se vjeshtën e shkuar me mjedra mbolli rreth 1 hektar, ku me qëllim fitimin, investoi mijëra euro kursime familjare.
“Investimi total ka qene diku afër 10 mijë euro. Por ky investim nëse vitin e ardhshëm nuk rritet çmimi i mjedrës, besoj se ka është vetëm investim koti. Çmimi është shumë-shumë i ulët, për me pasë mundësi me i mbulua shpenzimet ose investimet që i kemi bërë, e aq më pak për me pas fitim”.
Të pa kënaqur me çmimin janë edhe kultivues të tjerë të mjedrës. Disa nga ta madje dyshojnë se për uljen e çmimit të mjedrës ka marrëveshje të fshehta mes pikave grumbulluese. Por këtë gjë e mohojnë pikat grumbulluese. Bashkim Osmani pronar i një pike grumbulluese, thotë se çmimin e mjedrës e cakton tregu evropian.
“Ne nuk e caktojmë, por është kërkesë e tregut të bashkësisë evropiane. Për neve si pika grumbulluese sa më i shtrenjtë të jetë çmimi i mjedrës, aq më mirë është për neve. Se nëse ne i fitojmë 20%, atëherë po supozojmë 2 euro çmimi i saj, ne kishim me i fituar 40 cent, e jo në këtë rast 20”.
Kultivimi i mjedrës në Kosovë mori hov viteve të fundit, pasi që mbjellja e saj u subvencionu dhe sillte mjaft përfitime. Por, çmimi i ulët i këtij viti ka bërë që fermerët si Tomori Çitaku e Sami Shala, të mendojnë edhe për shkatërrimin e pemishteve me mjedra, në rast të mos ngritjes së çmimit, pasi që çmimi aktual nuk sjellë fitime. /Radio Kosova/
