Podujevë: A është e tepruar masa e suspendimit të 11 policëve nga IPK? – Risjellim detajet e ngjarjes

Inspektorati Policor i Kosovës dje ka rekomanduar Policisë suspendimin edhe të shtatë policëve për një rast dyshimi për keqtrajtim në stacionin policor të Podujevës që ndodhi muajin e kaluar.

Fillimisht, më 10 nëntor ishin suspenduar katër policë që dyshohet se kishin keqtrajtuar dy qytetarë, një prej tyre i mitur, brenda stacionit policor në Podujevë ku ishin në ndalim.

Hetuesit e IPK-së më pas zgjeruan hetimet dhe arritën në përfundimin se në këtë rast dyshohet se janë të përfshirë edhe shtatë policë – gjashtë me detyrë në stacionin policor në Podujevë dhe një në Drejtorinë Rajonale të Prishtinës. Për ta është rekomanduar suspendimi.

Si ndodhi rasti?

Sipas burimeve të PodujevaPress, ngjarja ka nisur kur një veturë e dyshimtë nuk i është ndalur patrullës policore. Pas kësaj, ka filluar ndjekja në disa fshatra të Podujevës: nga qyteti në drejtim të Shajkovcit, më pas kah Batllava, Lluzhani dhe sërish drejt Podujevës.

Ndjekja ka përfunduar në fshatin Sekiraq, tek rrethrrotullimi, ku policia ka arritur ta bllokojë automjetin. Në momentin e bllokimit, shoferi dyshohet se është kthyer në rikthim dhe ka goditur një polic, duke i shkaktuar dëmtim serioz të ligamentit të këmbës. Për shkak të situatës së rrezikshme, policët kanë qenë të detyruar t’i nxjerrin armët e shërbimit.

Çfarë po heton IPK?

Sipas informacioneve të para, Inspektorati po heton dyshimet për përdorim të tepruar të forcës brenda stacionit policor, ku raportohet se një nga të arrestuarit – i mitur – është goditur me shuplakë.

Suspendimi i 11 policëve ka hapur debat të gjerë në opinion, sidomos për proporcionalitetin e masës, duke marrë parasysh rrezikshmërinë e rastit dhe faktin se një polic është lënduar rëndë gjatë kryerjes së detyrës.

Policët: “Suspendim i tepërt, reagim në situatë të rrezikshme”

Burime brenda strukturave të sigurisë, në formë të modelit mbrojtës, theksojnë se zyrtarët policorë kanë vepruar në një situatë dinamike dhe tejet të rrezikshme, ku: automjeti i dyshuar ka refuzuar ndalimin ligjor, ka ndodhur ndjekje e gjatë në disa fshatra, një zyrtar policor ka pësuar lëndim të rëndë fizik, ka pasur rrezik të drejtpërdrejtë për jetën e policëve dhe pjesëmarrësve të tjerë në trafik.

Sipas tyre, dyshimet për përdorim force në stacion janë çështje që duhet të hetohen, por pezullimi i menjëhershëm i 11 zyrtarëve po konsiderohet i tepruar dhe po krijon shqetësim në pikën e sigurisë, sidomos duke marrë parasysh rritjen e ngjarjeve kriminale në Podujevë.

Rritja e kriminalitetit në Podujevë

Në muajt e fundit, qytetarët e Podujevës kanë shprehur shqetësime për: shtim të akteve të dhunshme, raste të therjeve me thika, rritje të qarkullimit të narkotikëve, incidente të shumta të rrezikshme në trafik.

Burime nga komuniteti i sigurisë thonë se suspendimi i një numri kaq të madh policësh nga një stacion relativisht i vogël mund të ndikojë negativisht në kapacitetin e menaxhimit të rendit publik në komunë.

Çfarë pritet më tej?

IPK do të vazhdojë hetimet për të përcaktuar nëse ka pasur shkelje disiplinore apo penale nga ana e zyrtarëve policorë. Ndërkohë, familjarët e policëve dhe pjesëtarë të komunitetit kërkojnë që procesi të jetë i drejtë, proporcional dhe të marrë parasysh rrethanat reale të rastit.

PodujevaPress do të qëndrojë me raportime të reja sapo të ketë zhvillime.