Podujevë: 59 persona të arrestuar në katër muaj!

Këshilli Komunal për Siguri në Bashkësi (KKSB) u mblodh për të diskutuar situatën e sigurisë në Podujevë, e cila u vlerësua si e qetë dhe stabile nga autoritetet. Megjithatë, raportet zyrtare tregojnë një rritje të rasteve kriminale, që ka çuar në arrestimin e 59 personave vetëm në katër muajt e fundit.

Komandanti i Stacionit të Policisë në Podujevë, Bashkim Bajrami, raportoi se nga data 01.12.2024 deri më 25.03.2025 janë regjistruar dy sulme në shkolla, një lëndim i rëndë trupor, 38 raste vjedhjeje dhe janë konfiskuar 27 armë e 321 fishekë. Po ashtu, janë kapur 2262 gram substanca narkotike dhe janë sekuestruar 2004 euro, si dhe pajisje të ndryshme elektronike.

Një nga treguesit kryesorë të luftës kundër krimit në Podujevë është numri i lartë i të arrestuarve – plot 59 persona gjatë kësaj periudhe. Arrestimet lidhen me vepra të ndryshme penale, përfshirë dhunën në familje, posedimin e narkotikëve dhe armëmbajtjen pa leje.

Në këtë periudhë janë shqiptuar 3341 gjoba trafiku, janë raportuar 30 raste dhune në familje, 25 raste të posedimit të narkotikëve dhe 50 raste të armëmbajtjes pa leje. Po ashtu, janë regjistruar 24 raste zjarrvënieje, një fenomen që po shqetëson institucionet.

Komandanti Bajrami shpjegoi edhe masat parandaluese të ndërmarra, përfshirë ligjërata në shkolla mbi përdorimin e internetit dhe bullizmin. Përfaqësuesit e KFOR-it dhe FSK-së vlerësuan sigurinë si të qetë, por theksuan rëndësinë e bashkëpunimit të vazhdueshëm me institucionet lokale.

Gjatë takimit, Drejtori i Drejtorisë së Arsimit, Avni Fetahu, prezantoi raportin mbi aktivitetet e KKSB për vitin 2024. Në diskutimet e mbajtura, anëtarët e KKSB-së trajtuan edhe çështje infrastrukturore dhe shërbime publike që lidhen me sigurinë e qytetarëve.

Pavarësisht vlerësimit të përgjithshëm për një situatë të qetë, numri i lartë i arrestimeve dëshmon për një luftë aktive kundër kriminalitetit në Podujevë, duke reflektuar përpjekjet e institucioneve për të rritur sigurinë publike.