“Të vras”, “E han plumbin” | Çifti e kërcënojnë njëri – tjetrin
![Podujeva ul shkallën dhe normat e tatimit në pronë](https://podujevapress.net/wp-content/uploads/2023/10/image-167-850x560.png)
Podujeva ul shkallën dhe normat e tatimit në pronë
Shkalla e tatimit në pronë dhe normat tatimore do të jenë më të ulëta në vitin 2024 në Komunën e Podujevës.
Nga 15 mijë euro sa ishte shkalla ku fillon të tatimohet prona, pragu ka kaluar në 30 mijë euro dhe po ashtu nga 0.15 për qind sa ishte norma tatimore, është ulur në 0.10 për qind për pronat bujqësore, objektet bujqësore dhe pronat pyjore.
Ky propozim është bërë nga PDK-ja dhe është mbështetur nga LDK-ja.
Drejtori për Buxhet dhe Financa, Fatlum Osmani, në seancën e fundit të Kuvendit Komunal i ka njoftuar kuvendarët komunalë se edhe këtë vit normat tatimore përcaktohen në bazë të kategorive të pronave, ndërsa nga viti 2025 tatimi do të llogaritet vetëm në bazë të vlerës së pronave.
“Do të thotë do të jetë një tatim progresiv duke u bazuar në vlerën e pronave pa marrë parasysh kategoritë e pronës. Për vitin 2024 shkalla e përllogaritjes së tatimit në pronë fillon nga 30 mijë euro. Në vitet e kaluara tatimi është llogaritur nga 15 mijë euro. Pra në rast se një pronë e ka pasur vlerën 30 mijë euro, 15 mijë eurot e para iu kanë zbritur dhe është llogaritur vetëm mbi bazën e 15 mijë eurove. Ndërsa tash kemi që llogaritet nga 30 mijë euro. Kështu që për të gjitha pronat që janë deri në 30 mijë euro vlera e tyre nuk paguajnë fare tatim në pronë”, ka thënë Fatlum Osmani.
Sipas tij, ato që kanë vlerën mbi 30 mijë euro paguajnë tatim mbi bazën e asaj vlere.
“Pra, nëse prona ka vlerën 40 mijë euro paguajnë tatim vetëm për 10 mijë euro. Duke i pas parasysh këta tregues ne kemi një zvogëlim të faturave të tatimit në pronë për vitin 2024 për pjesën dërrmuese të qytetarëve. 30 mijë euro vlen për pronat rezidenciale shkalla tatimore, ndërsa për prona bujqësore është mbi vlerën 50 mijë euro. Do të thotë deri në vlerën 50 mijë euro për prona bujqësore nuk paguhet fare tatim”, ka theksuar drejtori për Buxhet dhe Financa.
Këtij propozimi i kanë dhënë mbështetje LDK dhe LVV. Por, pas propozimit të PDK-së për ulje të normave tatimore për pronat bujqësore, këshilltarët e LDK-së i kanë dhënë mbështetje edhe këtij propozimi.
“Edhe në KPF i kam dhënë tri propozime sa i përket 3 pikave të para. Pika 1.1 për njësitë bujqësore të parcelave nga 0.15 për qind të zbritet në 0.10 për qind. Pika 1.2 për njësitë bujqësore të objekteve nga 0.15 në 0.10 për qind dhe pika 1.3 për njësitë pyjore të parcelave nga 0.15 në 0.10 për qind”, ka propozuar shefi i Grupit të PDK-së, Bashkim Syla.
Por drejtori Osmani ka thënë se vlerësimin e pronave e bën Ministria e Financave-Departamenti për tatimin në pronë.
“Dhe vlerësimi i tyre bëhet në bazë të zonave të Komunës së Podujevës. Qyteti i ka disa zona, pastaj fshatrat edhe ata ndahen secili në zonën e veçantë. Ju thash se ka zbritje të theksuar të tatimit në pronë për shkak të shkallëve të përllogaritjes nga 15 mijë ka shkua në 30 mijë. Unë i kam edhe llogaritjet ta zëmë nëpër fshatra sillen nga 250 deri në 300 euro për metër katror pronat rezidenciale. Kjo i bie që për një shtëpi 100 metra katrorë në një fshat ai nuk paguan fare tatim”, ka deklaruar Fatlum Osmani.
“Kështu që në rast se ulet akoma më shumë tatimi në pronë që për mendimin tim kjo 30 mijë euro ka qenë e tepruar, po i humb funksioni sistemit të tatimit në pronë. Se edhe në rast se shtëpia është 120 m2 (në fshatra), po i bie me pagua më pak se 5 euro. Ndërsa komuna duhet t’i kryej disa shërbime: duhet me dëgua zarfin në shtëpi nga ana e postës, shërbimin e shtypjes së faturës, kështu që i humb funksioni i tatimit në pronë ulja e mëpastajshme. Po ashtu edhe në buqjësi pagesa është minimale”.
Por, propozimi i PDK-së për uljen e tatimit në pronë për 3 pikat nga 0.15 në 0.10 për qind ka kaluar me 16 vota (PDK e LDK)./KOHA net/N.Toverlani/