Podujeva synon të rrisë bashkëpunimin në turizëm dhe bujqësi me komunat e Shqipërisë

Turizmi e bujqësia janë dy fusha në të cilat mund të shtojnë bashkëpunimin Komuna e Podujvës me komuna të Shqipërisë, ka qenë pajtimi që kanë arritur kryetari i Komunës së Podujevës, Shpëjtim Bulliqi dhe ambasadori i Shqipërisë në Kosovë, Qemal Minxhozi, pas një takimi të mbajtur të mërkurën.

“Po dalim nga një takim vëllazëror me ambasadorin e Shqipërisë, Qemal Minxhozi, me të cilin diskutuam për disa tema që lidhen me bashkitë e Shqipërisë. Njëra ndër to ishte çështja e agrobiznesit pasi duke qenë një komunë agrare dhe pozitën gjeografike që ka, është hap i rëndësishëm që mund të bëjmë në këtë drejtim. Në Shqipëri është mjaft i zhvilluar agrobiznesi dhe mund të marrim modele nga atje. Po ashtu folëm edhe për binjakëzimin, por edhe sfera të tjera si arsimi profesional”, ka thënë Bulliqi.

Ai e ka përmendur këndin e arkivit të Shqipërisë që është hapur në objektin e vjetër të administratës, ku siç ka thënë Bulliqi, nxënësit e studentët llapjanë mund t’u qasen të dhënave pa pasur nevojë të shkojnë në Shqipëri.

Ambasadori Minxhozi ka thënë se Podujeva është komunë e rëndësishme edhe për shkak të pozitës gjeografike, por edhe historisë që ka.

“Marrëdhëniet midis nesh duhet të konkretizohen. Shqipëria është vend që merret kryesisht me turizëm bregdetar, pak edhe malor. E Kosova merret më shumë me turizëm malor. Ka kompani të interesuara nga Shqipëria për turizëm malor, si për shembull në Batllavë. Shqipëria mund të ofrojë përvojë shumë të mira për këtë. Ne jemi në bisedime edhe me Komunën e Lezhës, që jo vetëm për turizmin, por të rrisim bashkëpunimin edhe në bujqësi”, është shprehur Minxhozi.

Ai ka theksuar se nxënësit e Shkollës Ekonomike në Podujevë mund të mësojnë më shumë për turizmin dhe të profilizohen në këtë fushë, që pastaj jo vetëm të bëjnë praktikën në Shqipëri, por edhe të mund të punësohen atje.

“Shqipëria e Kosovë janë të bashkuara sidomos në fushën e turizmit. Ne jemi shumë të interesuar që të kemi bashkëpunim përmbajtjesor”, ka thënë ai./KOHA net/