Podujeva subvencionon bizneset për rritje të kapaciteteve prodhuese

Komuna e Podujevës ka ndihmuar me subvencione 16 biznese për të rritur kapacitete prodhuese.

Drejtori për Planifikim dhe Zhvillim Ekonomik, Vigan Salihu, i ka vizituar disa prej bizneseve përfituese.

Salihu ka thënë se kjo është hera e parë e mbështetjes së bizneseve në këtë formë.

“Sot gjatë ditës drejtori për Planifikim dhe Zhvillim Ekonomik, Vigan Salihu i shoqëruar edhe nga dy anëtarët e komisionit Mimozë Restelica dhe Rilind Babatinca kanë vizituar bizneset ‘Nota Cakes’, ‘Mobilerinë Qaza’, ‘Fresh Farm’ shpk, ‘Bujari’ Al Pvc dhe ‘Alko’ shpk, të cilat janë përfituese nga ana e komunës në projektin e subvencionimit të investimeve në kapacitete prodhuese. Nga ky projekt janë gjithsej 16 biznese përfituese, ku shuma maksimale e subvencionit ka qenë 10,000 euro”, thuhet në njoftimin e Zyrës për Informim të Komunës së Podujevës.

Salihu ka thënë se ky subvencionim i ka ndihmuar bizneset për të gjeneruar vende të reja të punës.

“Drejtori Salihu gjatë vizitave tha se është hera e parë që kemi filluar me këtë formë të mbështetjes për bizneset prodhuese në shtim të kapaciteteve të tyre prodhuese, si dhe tha se ndjehet shumë i lumtur që po arrijmë t’i ndihmojmë bizneset lokale në fuqizimin e tyre në prodhim dhe në gjenerim të vendeve të reja të punës”, përfundon njoftimi.