Podujeva shlyen 380 mijë euro borxhe të tregtarëve

386 mijë e 760 euro është shuma totale e qirave të papaguara nga shfrytëzuesit e lokaleve e tezgave në tregun e qytetit të Podujevës. Kuvendi Komunal mori vendim që ky borxh t’u falet tregtarëve. Megjithëkëtë, zyrtarët komunalë paralajmëruan se nuk do të ketë më tolerancë për mospagesën e obligimeve. E tregtarët u ankuan se nën kushtet aktuale e kanë të pamundur që t’ia paguajnë obligimet Komunës

Kuvendarë të Podujevës e miratuan propozim-vendimin për t’ua shlyer tregtarëve të gjitha borxhet e qirasë për shfrytëzimin e 59 lokaleve e 52 tezgave në tregun e qytetit.

Shuma totale e borxhit, që nga funksionalizimi i tregut e deri më sot, ka arritur në 386 mijë e 760 euro. Ajo individuale për shfrytëzuesit e lokaleve sillet nga 860 deri në 14 mijë e 139 euro, kurse ajo për tezga, nga 7 euro e 20 centë deri në 1 mijë e 830 euro.

Megjithëse e përshëndetën vendimin, disa nga tregtarët e arsyetuan akumulimin e borxhit me pretendimin se tregu nuk është ndërtuar në lokacionin e duhur dhe se si rrjedhojë nuk kanë pasur mjaftueshëm punë.

“Vendimi i Kuvendit Komunal është i mirëseardhur për neve dhe është një lehtësim, jo një lehtësim, po me të tregu drejt, këtu asnjëri prej tregtarëve atë shumë nuk mundet me përballu me pagu, nuk ka qarkullim, nuk mundet me pagu. Na jemi kanë edhe të detyruar cilin ta pyesësh me ia dhanë çelësin se s’ka mundësi ndryshe”, ka thënë tregtari Ismajl Sfishta.

Në Komunë thanë se vendimi u mor si një lehtësim për tregtarët, por paralajmëruan se nuk do të ketë më tolerim për moskryerjen e pagesave.

“Komuna përmes thirrjeve publike për dhënien në shfrytëzim të hapësirave të saj do t’iu bëjë ftesë të gjithë të interesuarve, bizneseve të cilat kanë interes për t’i shfrytëzuar ato hapësira, do t’u mundësojë që të lidhin kontratë me komunën dhe në raste se qytetarët kanë interesim për t’i shfrytëzuar ato hapësira, atëherë ata mund të bëjnë një kontratë me komunën dhe në rast se nuk respektohet kjo kontratë, atëherë komuna është e obliguar që t’i shkëpusë kontratat”, ka deklaruar Fatri Zhitia, zëdhënës në Komunën e Podujevës.

E Ismajl Sfishta, përfaqësues i tregtarëve, u ankua për kushtet në treg teksa tha se shkaku i tyre do të jetë i pamundur mbulimi i obligimeve.

“Ne do të përpiqemi që t’i kryejmë obligimet ndaj shtetit, ndaj komunës normal, po edhe me këto kushte nuk mundemi me i krye. Nën 1: nuk ka menaxhim të tregut, duhet me pas rojën. Këtu u ba tregu parking. Vjen qytetari prej ku me ditë ku, vjen e parkon kerrin gjithë ditën e lume, konsumatori nuk ka qasje, nuk mund e parkon 5 ose 10 minuta deri t’i kryen punët e veta. Këtu nuk ka WC publike, nuk ka ujë, nuk ka ndriçim”, shprehet Sfishta.

Zyrtarët komunalë thanë se synojnë që në vendin ku aktualisht ndodhet Stacioni i Autobusëve, të ndërtohet një treg i ri që, sipas tyre, do të ketë kushte më të mira për tregtarët./KOHA net/N.Toverlani/