Podujeva nuk ia konfiskoi sigurimin e tenderit në vlerë 12 mijë euro operatorit që i ra pishman

Komuna e Podujevës ka bërë një tolerim me një operator ekonomik që ishte tërhequr nga tenderi për ndërtimit e një shkolle në këtë Komunë. Ligji e parasheh që në raste të tilla autoriteti kontraktues e konfiskon sigurimin e tenderit, por që në rastin konkret Komuna nuk e kishte bërë një hap të tillë.

Pika 29.8 e Rregullat dhe Udhëzuesi Operativ për Prokurimin Publik parasheh që “Autoriteti Kontraktues do të konfiskojë sigurimin e tenderit në situatat: 1. AK konstaton që OE ka dorëzuar informata të pavërteta ose mashtruese; 2. OE tërheq tenderin e tij pas afatit të fundit për dorëzim të tenderëve, por para skadimit të periudhës së validitetin të tenderit; dhe 3. OE fiton kontratën por refuzon ose dështon të ofrojë sigurimin e ekzekutimit, siç specifikohet në DT; b. Të respektojë kushtet tjera që paraprijnë nënshkrimin e kontratës, siç specifikohet në DT; ose c. Të performojë kontratën, sipas specifikimeve në DT.

“Në procedurën e prokurimit që ka të bëjë me projektin ‘Ndërtimi i shkollës në fshatin Obrançë’, komuna kishte propozuar dhënien e kontratës Operatori Ekonomik (OE) dhe kishin kërkuar nga ai që t’i ofrojë dëshmitë e përshtatshmërisë (vërtetimin nga ATK dhe vërtetimin nga Gjykata) për ta nënshkruar kontratën. OE nuk i kishte ofruar dokumentet e kërkuar me arsyetimin se do të tërhiqet nga ky proces për shkak të krizës ekonomike, çmimet që ka ofruar janë më të ulëta sesa ato në treg. Komuna nuk kishte bërë konfiskimin e sigurimit të tenderit nga OE i cili ishte tërhequr. Vlera që është dashtë të tërhiqet ishte 12,000€”, thuhet në raportin e Zyrës Kombëtare të Auditimit për vitin 2022.

Bazuar në raportin e Auditorit, kjo ka ndodhur për shkak të anashkalimit të rregullave nga ana e Zyrës së prokurimit për ta konfiskuar sigurinë e tenderit nga OE.

“Moskonfiskimi i sigurisë së tenderit ndikon që të hyrat komunale të jenë më të ulta në anën tjetër, kjo mund të ndikojë që OE mos të përfillin rregullat edhe në rastet tjera tenderuese. Kryetari duhet të shtojë kontrollet ndaj Zyrës së prokurimit dhe në rastet kur OE tërhiqen gjatë procesit të tenderimit të bëhet konfiskimi i sigurisë së tenderit”, thuhet tutje në raport.

Në anën tjetër, zyrtarët komunalë janë arsyetuar se ky tolerim është bërë për shkak të inflacionit.

“Konfiskimi i sigurimit në bazë të zyrës së prokurimit nuk ka ndodhur për arsye të periudhës inflacioniste e cila ka qenë, mirëpo në këtë vit në raste të tilla do të konfiskohet sigurimi të gjithë operatorëve ekonomikë”, thuhet në përgjigjen e Komunës së Podujevës. /KOHA net/