Podujeva miraton Rregulloren për këshillat e fshatrave

Drejtoresha për Administratë, Antoneta Ejupi, ka thënë se në mbledhjen e 30 qershorit janë marrë vesh që ndryshimet në draftin e kësaj rregulloreje të bëhen vetëm në nenin 4. “Kjo draft-rregullore i ka kaluar të gjitha fazat e nevojshme për hartimin e një akti, siç është shqyrtimi fillestar… Me pajtimin e të gjitha grupeve të subjekteve politike dhe me pajtimin e ekzekutivit jemi dakorduar që të shkojmë në pauzë, por pas pauzës nuk kishte kuorum për të vazhduar mbledhja”, ka theksuar ajo

Kuvendarët e Podujevës e kanë miratuar Rregulloren për organizimin dhe bashkëpunimin e Komunës me fshatrat, vendbanimet dhe lagjet urbane. Këtij dokumenti i është dhënë epilog në mbledhjen e së premtes, pas shumë vonesave.

Drejtoresha për Administratë, Antoneta Ejupi, ka thënë se në mbledhjen e 30 qershorit, kur ka qenë edhe kjo pikë e rendit të ditës, janë marrë vesh që ndryshimet në draftin e kësaj rregulloreje të bëhen vetëm në nenin 4, që e bën organizimin e këshillave në lagjet urbane dhe fshatrat e Podujevës.

“Kjo draft-rregullore i ka kaluar të gjitha fazat e nevojshme për hartimin e një akti, siç është shqyrtimi fillestar. Janë mbajtur edhe diskutimet publike dhe janë hartuar raportet përkatëse. Ky dokument ka qenë si pikë shtesë e rendit të ditës në seancën e 30 qershorit. Me pajtimin e të gjitha grupeve të subjekteve politike dhe me pajtimin e ekzekutivit jemi dakorduar që të shkojmë në pauzë, por pas pauzës nuk kishte kuorum për të vazhduar mbledhja”, ka theksuar Antoneta Ejupi.

Ajo ka treguar se pas mbledhjes së 30 qershorit, e kanë mbajtur një takim edhe me subjektet politike dhe të shoqërisë civile dhe si Komunë e kanë bërë një organizim ndryshe të pjesës urbane dhe të fshatrave.

“Me Udhëzim Administrativ përcaktohet se Komuna e Podujevës mund të ketë vetëm 30 këshilla të fshatrave dhe lagjeve urbane. Pjesa e fshatrave është ndarë në 24 këshilla. Në bazë të UA-së një këshill nuk mund që të ketë më shumë se 9 fshatra. Kjo ndarje është bërë duke marrë parasysh afërsinë, lidhjen e fshatrave, si dhe numrin e banorëve. Ne si ekip jemi munduar të bëjmë më të mirën e mundshme brenda mundësive dhe kornizës ligjore. Të gjithë jemi në dijeni që kjo rregullore është stërzgjatur shumë dhe duhet t’i jepet epilog kësaj çështjeje”, është shprehur drejtoresha e Administratës.

Por, këshilltari i LDK-së, Qëndrim Softolli, e ka quajtur të papranueshme dhe joserioze që materiali për këtë çështje t’u sillet në seancë.

“Nuk është material që shtjellohet për çështje minutash. Dhe, ne si grup nuk e përkrahim këtë. As anëtarëve të komisionit nuk ua keni dërguar materialin”, ka thënë ai.

Por, Antoneta Ejupi ka thënë se asnjë ndryshim nuk është bërë nga ai takim, ku kanë qenë edhe anëtarë nga LDK-ja.

“Jemi dakorduar që materialin ta sjellim në seancë, kjo ka qenë marrëveshja jonë. Kisha dashur me i dhënë 10 minuta me e kontrolluar materialin”.

Ndërkohë, këshilltari tjetër nga LDK-ja, Naim Çunaku, i cili ka qenë edhe pjesë e atij takimi, ka thënë se prej vitit 2007 është Udhëzimi i parë për këta këshilla dhe se Komuna nuk ka arritur t’i funksionalizojë këshillat e fshatrave.

“Këshillat e fshatrave do të ndihmonin për një investim më të mirë, më të qëndrueshëm dhe kur folët për qytetarin, ta afrojmë edhe më shumë në vendimmarrje. Këtu jemi me i dhënë rrugë kësaj dhe duhet të dalim nga kjo situatë. Këshillat e fshatrave në atë moment që na marrin ngjyrime politike, nuk mundemi me i bërë. Materialin e atij takimi nuk e kemi pasur as ne si Komision deri sot në seancë. Dakordanca që kemi pasur në takim na u është avulluar rrugës”, ka thënë Naim Çunaku.

Ai ka theksuar se në takim ka kërkuar që nenit 8 t’i shtohet edhe pika 4, ku komuna përdor platformën elektronike për informimin, komunikimin, konsultimin dhe bashkëveprimin me këshillat lokale.

Ndërsa, drejtoresha Ejupi ka thënë se kjo mund të integrohet më vonë me një plotësim-ndryshim të rregullores, me çka nuk është pajtuar këshilltari Çunaku.

Edhe këshilltarë të tjerë komunalë nga LVV-ja e LDK-ja kanë kërkuar që të ndryshohen disa këshilla, ku fshatra të caktuara janë futur në këshilla të tjerë, për shkak të afërsisë dhe lidhjes më të lehtë të tyre. Në fund të gjithë janë pajtuar dhe Rregullorja për organizimin dhe bashkëpunimin e Komunës me fshatrat, vendbanimet dhe lagjet urbane është miratuar me ndryshimet që janë propozuar nga këshilltarët komunalë.

© KOHA. N.Toverlani