Podujeva merr pëlqimin nga MMPHI-ja për Hartën Zonale

Kryetari i Podujevës, Shpejtim Bulliqi, nëpërmjet një statusi në “Facebook” ka njoftuar se Komuna ka marrë pëlqimin nga Ministria e Mjedisit, Planifikimit Hapësinor dhe Infrastrukturës për hartën zonale.

Bulliqi ka thënë se shumë shpejt ky dokument do t’u paraqitet edhe këshilltarëve komunalë. “Një lajm jashtëzakonisht i mirë për qytetarët dhe Komunën e Podujevës është marrja e pëlqimit për Hartën Zonale të Podujevës nga Ministria e Mjedisit, Planifikimit Hapësinor dhe Infrastrukturës. Harta zonale është një nga dokumentet kryesore sa i përket planifikimit hapësinor, me të cilin përcaktohen zonat në të cilat do të vendosen kushtet dhe veprimet për zhvillimin hapësinor komunal”, ka shkruar Shpejtim Bulliqi. “Së shpejti këtë dokument do ta paraqesim para këshilltarëve për miratim në Kuvendin e Komunës. Uroj që të gjejë mbështetje të plotë ky dokument që është tepër i rëndësishëm për planifikimin urban dhe zhvillimin komunal”.

Ky dokument i kishte kaluar të gjitha procedurat në ish-qeverisjen komunale të LDK-së, por nuk kishte arritur të miratohej.

Ndërkohë, vitin e kaluar pushteti i LVV-së pas disa plotësim-ndryshimeve e kishte miratuar vendimin që të dalë në diskutim publik.