Podujeva drejt zgjedhjeve lokale 2025: Gara e heshtur që po nxehet çdo ditë

Podujeva po hyn në një nga garat më interesante zgjedhore të dekadës së fundit. Zgjedhjet lokale të tetorit 2025 kanë bërë që partitë politike në qytet të hyjnë në një “luftë” të heshtur, por të ashpër, për të siguruar pozicionin më të favorshëm para se të fillojë fushata zyrtare.

Përfundimi i listave për Asamblenë Komunale ka qenë hapi i parë ku dallohen strategjitë e subjekteve politike. Lëvizja Vetëvendosje ka përfunduar listën e saj, të cilën, sipas burimeve të PodujevaPRESS, tashmë e ka të kompletuar dhe të gatshme për regjistrim. LDK, e cila historikisht ka pasur bazë të fortë në Podujevë, gjithashtu e ka përfunduar listën, por po e mban jo publike, duke pritur momentin e fundit për ta bërë publike emrat e kandidatëve. PDK po punon në përmbylljen e saj, ndërsa AAK e ka thujse në përfundim dhe lista e quajtur “Unioni i Blakqoreve” e cila është fokusuar vetëm në listat për Asamble, pa kandidatë për kryetar.

Një element që ka spikatur këto javë janë aderimet e reja, të cilat partitë po i shfaqin si tregues të fuqizimit dhe zgjerimit të tyre. Çdo subjekt po synon të krijojë perceptimin e një rritjeje të mbështetjes, duke tentuar të ndikojë psikologjikisht te votuesit e pavendosur.

Megjithatë, mbetet të shihet se sa do të përkthehen këto lëvizje në vota reale. Qytetarët e Podujevës, të cilët shpesh kanë treguar se dinë të bëjnë dallimin mes premtimeve të fushatës dhe realitetit të qeverisjes, do të vendosin nëse ndryshimet e listave dhe aderimet do t’i bindin të votojnë për ndonjërën nga palët.

Analistët lokalë parashikojnë një garë të fortë për të shmangur balotazhin. Për VV-në, mbajtja e mandatit do të jetë provë e menaxhimit katërvjeçar e për LDK-në, një mundësi për rikthim ndërsa për PDK-në e AAK-në, shansi për të zgjeruar ndikimin në një terren tradicionalisht sfidues.

Një gjë është e qartë tetori do ta gjejë Podujevën në qendër të vëmendjes politike, ku çdo votë mund të bëjë diferencën mes fitores direkte dhe një balotazhi të paparashikueshëm./PodujevaPRESS.net/