Podujeva aktivizon Qendrën Operative Lokale Emergjente

Zyrtarët komunalë të Podujevës kanë marrë masa shtesë për të zbatuar vendimin e Ministrisë së Shëndetësisë për kufizimin e lëvizjeve. Në takimin e Shtabit Emergjent të Komunës që është mbajtur sot, është vendosur të aktivizohet Qendra Operative Lokale Emergjente. Në njoftimin e Komunës së Podujevës thuhet se kjo Qendër do të trajtojë kërkesat e qytetarëve në këtë situatë emergjente shëndetësore.

“Shtabi Emergjent i Komunës së Podujevës për veprime dhe masa parandaluese e mbrojtëse nga COVID-19, në takimin e sotëm e ka vlerësuar gjendjen epidemiologjike në komunë dhe masat që duhet ndërmarrë pas vendimeve të Ministrisë së Shëndetësisë. Në takimin e Shtabit Emergjent i Komunës së Podujevës për veprime dhe masa parandaluese e mbrojtëse nga COVID-19, të cilin e ka udhëhequr nënkryetari i Komunës, Nexhmi Rudari, është konstatuar se aktualisht në territorin e komunës nuk ka persona të infektuar me Virusin Corona”, thuhet në njoftimin për media të Komunës së Podujevës.

Sipas të njëjtit, kompania e angazhuar nga Komuna po vazhdon me dezinfektimin e hapësirave publike në qytet dhe objektet e institucioneve shëndetësore e administrative, si dhe hapësirat te familjet ku kishim rastet me persona të infektuar me COVID-19.

“Në këtë takim u vendos që të aktivizohet Qendra Operative Lokale Emergjente, e cila do të trajtojë kërkesat e qytetarëve në këtë situatë të emergjencës shëndetësore. Nënkryetari Rudari kërkoi që gjatë kësaj periudhe t’i kushtohet rëndësi respektimit të rekomandimeve të institucioneve shëndetësore për aplikimin e masave mbrojtëse nga punëtorët e marketeve dhe dyqaneve ushqimore, furrave të bukës dhe të institucioneve që ofrojnë shërbime të ndryshme si dhe respektimit të distancës sociale nga qytetarët”, thuhet në njoftim.