Po ndërtohet nga kompania bullgare, publikohen pamje nga rruga Prishtinë-Mitrovicë

Ndërtimi i rrugës Mitrovicë-Prishtinë është në avancim, ku po punohet çdo ditë për realizimin e funksionalizimit të saj.

Kështu thotë dhe ministri i Mjedisit, Planifikimit Hapësinor dhe Infrastrukturës, Liburn Aliu përmes një postimi në Facebook.

Ai ka shtuar se po bëhet gjithçka për të ofruar të gjithë infrastrukturën e nevojshme për një nga rrugët më të rëndësishme për zhvillimin ekonomik të vendit.

Punimet në këtë rrugë pritet të përfundojnë në fillim të vitit 2025, pasi Ministria e Infrastrukturës nënshkroi kontratë të re për këtë segment rrugor më 8 shkurt të vitit 2024.

Pas nënshkrimit të kontratës, punimet kanë filluar menjëherë.

Siç raportoi Paparaci në muajin shkurt, kompania bullgare “Hydrostroy”, në pronësi të manjatit bullgar Veliko Zhelev, është përzgjedhur fituese e kontratës për projektin. Zhelev është personazh i njohur në vendin e tij, Bullgarinë, ku ka ushtruar funksione publike në të kaluarën. Ku fiton rregullisht tenderët me vlerën më të lartë për ndërtimin e rrugëve. Ku dyshohet për keqpërdorim të kontratave publike.

Projekti për zgjerimin e rrugës Prishtinë-Mitrovicë ka nisur në vitin 2009. Asokohe kishin nisur edhe punimet.

Megjithatë, pas më shumë se një dekade punimet janë zvarritur e disa herë ka pasur edhe shembje në pjesët ku ishte punuar.