Plas sherri mes mikut e dhëndrit në Podujevë, 43-vjeçari e kërcënon burrin e motrës
Konfliktet në familjet kosovare janë të shpeshta dhe në shumicën e rasteve eskalojnë në përleshje e kanosje serioze. Një rast i tillë që dyshohet se ka ndodhur në fshatin Konushefc në Podujevë është denoncuar gjatë ditës së djeshme dhe një person tashmë ndodhet në ndalim, raporton Gazeta Sinjali.
Siç mëson Sinjali, këtë herë në rast janë përfshirë dhëndri dhe miku, ku ky i fundit po dyshohet se ka pasur telashe me burrin e motrës.
Në bazë të informacioneve të para, viktima është ai që ka kërkuar ndihmën e Policisë dhe ka raportuar se miku i tij e ka kërcënuar për shkak të disa mosmarrëveshjeve mes tyre.
Burimet e njëjta kanë bërë me dije se i dyshuari e ka ofenduar, sharë e kanosur dhëndrin përmes telefonit, për çka viktima ka deponuar edhe dëshmi.
Si rezultat i denoncimit, i dyshuari është shoqëruar në stacion policor, ku ka dhënë deklaratën e tij lidhur me rastin.
Pas përfundimit të procedurave policore, me urdhër të Prokurorit të Shtetit, i dyshuari është dërguar në mbajtje dhe ndaj tij është iniciuar rasti për veprën penale “Kanosja”.
