Plani “A” dhe “B” për Ushtrinë e Kosovës

Transformimi i Forcës dhe Sigurisë së Kosovës në FAK apo marrja e kompetencave shtesë, me ndryshimin e ligjit për FSK-në, mbetën ndër sfidat kryesore për vendin. Analistët konsiderojnë se ekzistojnë dy projekte që kjo çështje të kryhet përfundimisht.

Eksperti për çështje të sigurisë, Florian Qehaja ka treguar për Indeksonline “Planin A” dhe “Planin B” për transformimin apo shtimin e kompetencave të FSK-së. Sipas tij, i gjithë procesi është në duart e vendorëve dhe vendimi duhet të bazohet në një vendosshmëri shtet-formuese.

“Procesi duhet të jetë kësisoj: T’i jepet një ultimatum (afat) Listës Serbe që të reflektojë apo eventualisht ajo të pranojë propozimin i cili ka rrjedhë nga rishikimi strategjik i sektorit të sigurisë, e kjo është që të ndryshohet Kushtetuta. Pra, ky do të ishte rezultati më i mirë”, ka thënë Qehaja.

Nëse serbët nuk arrijnë që brenda periudhës tre mujore t’i thonë “PO”, atëherë Kosova para faktorit ndërkombëtarë duhet të dërgojë mesazhe që janë shtjerrë gjitha mundësitë për procedimin me planin A, tregon ai.

“Kjo shkon në favor të pozicionit të Serbisë i cili është shumë më agresiv kohëve të fundit. Ne do t’i njoftonim partnerët tanë në SHBA dhe të tjerë se janë shtjerr mundësit për planin A dhe të vazhdojmë në planin tjetër. Plani B nuk e bën më pak ushtri apo forcë të armatosur se sa plani A”, ka thënë ai.

(Foto: Florian Qehaja, analist)

Sipas Qehajës, gjithë çfarë mbetet, në vitet e ardhshme, është emri që do të jetë. FSK-ja do të merrte mandat të mbrojtjes, do ta forconte komponentin e këmbësorisë, të kalonte nga armatimi i lehtë në armatim gjysmë të rëndë, me pajisje të artilerisë të lehtë dhe të rëndë.

“Përveç kësaj, do të formohej Brigada për Reagime Luftarake. Momentin që ne vazhdojmë me planin B dhe marrim sinjale menjëherë nga shtetet partnere që do të na përkrahin me trajnime dhe të na japin pajisje dhe mundësisht të na ofrohen mirëmbajtje (të autoblindave, altirelisë të lehtë e rëndë, helikopter, transportues, pajisje personale…) Momentin që procedojmë me planin B, në kohën kur SHBA jep “dritën jeshile”, ne do të bazohemi në zhvillimin e forcës na baza bilaterale Bashkpunimi me SHBA-në, Britaninë e Madhe, Gjermaninë, Turqinë, Kroacinë dhe Shqiëprinë, këto janë gjastë partnerët që janë deklaruar se do të na përkrahin në bërjen e ushtrisë në suaza bilaterale”, ka potencuar në fund Qehaja. /Indeksonline/ Alban Muhaxheri/